ІІM jyl basynan beri izdeýde júrgen 58 qylmyskerdi ustady

<p>Jyl basynan beri Іshki ister mınıstrliginiń jedel qyzmetteri men onyń bólinisteri izdeýde júrgen 58 qylmyskerdi ustady, dep habarlaıdy <a href="Kazinform" target="_blank" rel="noopener">Kazinform.</a></p>

ІІM krımınaldyq polıtsııa departamenti bastyǵynyń orynbasary Rýslan Nazarov Polisia.kz saıtynyń tilshisine bergen suhbatynda olardyń keıbiri týraly aıtyp berdi. 

Aqtaý polıtsııasy jergilikti turǵyndy ustady. Ol ótken jyldyń qarasha aıynda mas kúıinde kafelerdiń birinde bolǵan janjal barysynda qala turǵynyn uryp-soqqan. Jábirlenýshi aýyr hálde aýrýhanaǵa jatqyzylǵan bolatyn. Ózbekstannyń Úshqorǵan qalasynda jergilikti quqyq qorǵaý organdary Almaty oblysynyń krımınaldyq polıtsııa qyzmetkerlerimen birlesip, eki adamnyń ólimine qatysy bar, izdeýde júrgen osy eldiń azamatyn ustady. Er adam 2012 jyly Almaty oblysynyń Eńbekshiqazaq aýdanynda jumys istep júrip, zeınetkerlerdiń úıine zańsyz kirip, olardy óltirip, aqsha urlap ketken.

Elorda polıtseıleri qostanaılyq áriptesterimen birlesip, 2020 jyly Astanadaǵy jobalyq turǵyn úı kesheninde páterlerdi ınvestıtsııalaý jáne brondaý syltaýymen 144 úleskerdiń aqshasyn ıemdengen JShS dırektory men quryltaıshysyn ustady. Qaskóı taǵy eki basqa JShS basshylarymen birge 4 mlrd teńgeni jymqyrǵan. Sońǵy atalǵandar da buryn ustalyp, qazir ústerinen tergeý júrgizilip jatyr.

Budan bólek respýblıkanyń krımınaldyq polıtsııa qyzmetkerleri habar-osharsyz ketken 30 adamdy anyqtady.