Mıanmada quldyqta bolǵan Qazaqstanyń eki azamaty elge jetkizildi

ASTANA. QazAqparat – Mıanmada quldyqtan bosap shyqqan Qazaqstanyń eki azamaty elge jetkizildi. Bul týraly elordada ótken baspasóz máslıhatynda Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Jaqynda elimizdiń eki azamaty Qazaqstanǵa jetti. Juma kúni týystary habarlasyp, Mıanmadaǵy kompanııadan qashyp shyqqandary týraly aıtty. Bizdiń konsýl dereý Taılandtyń shekarasyna baryp, Mıanmadaǵy shaǵyn qalashyqtyń shetinen olardy alyp ketti. Osy oraıda olarǵa qaýipsiz jerge jasyrynýǵa nusqaý berdik. Óıtkeni atalǵan kompanııa ókilderi olardy izdeıtin bolsa, bul azamattardy dereý taýyp alatyny anyq edi. Jergilikti turǵyndar da osy kompanııaǵa kómektesýi múmkin edi», - A. Smadııarov.

Onyń aıtýynsha, Qazaqstan azamattary Bangkokke jetkizilgennen keıin, olardyń qujattary rásimdelgen. Kóshi-qon zańnamasyn buzý derekterine qatysty aıyppuldary tólendi.

«Sonymen qatar, olarǵa Qatar arqyly áýe kóligimen ushyp kelý úshin bılet satyp alynyp, keıin Almatyǵa jetkizildi», - dedi resmı ókil.

Budan buryn habarlanǵandaı, 16 qańtar kúni QR Syrtqy ister mınıstrligi BAQ ókilderine Taıland pen Mıanma elderinde quldyqqa tap bolǵany týraly málimdegen qazaqstandyqtardyń jaǵdaıy týraly málimet berdi.

Foto: gov.kz