M.Sársembaev Ortalyq saılaý komıssııasynyń múshesi bolyp taǵaıyndaldy - Májilis

ASTANA. QazAqparat - Búgin Parlament Májilisiniń jalpy otyrysynda Marat Aldońǵaruly Sársembaev Qazaqstan Respýblıkasy Ortalyq saılaý komıssııasynyń múshesi qyzmetine taǵaıyndaldy.

QR Konstıtýtsııasyna sáıkes, Parlamenttiń ár palatasy Ortalyq saılaý komıssııasynyń eki múshesin qyzmetke taǵaıyndaıdy. Sonymen qatar Konstıtýtsııanyń 58-baby, 3-tarmaǵy, 7-tarmaqshasyna sáıkes Ortalyq saılaý komıssııasynyń múshelerin palata Tóraǵasy usynady.

Osyǵan baılanysty Májilis Tóraǵasy Marat Aldońǵaruly Sársembaevty Ortalyq saılaý komıssııasynyń múshesi qyzmetine taǵaıyndaý týraly usynys jasaǵan.

«M.Sársembaev zań ǵylymdarynyń doktory, professor. Halyqaralyq quqyq boıynsha Qazaqstandaǵy bilikti zańgerlerdiń biri, birqatar ǵylymı jarııalanymdardyń avtory. Memlekettik jáne ǵylymı salalarda úlken tájirıbesi bar. 2005 jyldan beri Ortalyq saılaý komıssııasynda qyzmet etip keledi», - dedi kandıdatýra týraly baıandaǵan Májilistiń Zańnama jáne sot-quqyqtyq reforma komıtetiniń tóraǵasy Rahmet Muqashev.

Palata depýtattary atalǵan usynysqa qoldaý bildirdi.