M.Demeýov: Saılaý kúni qoǵamdyq tártipti qamtamasyz etý ishki ister organdary basshylarynyń jiti baqylaýynda

ASTANA. QazAqparat - Saılaý kúni qoǵamdyq tártip pen qaýipsizdikti qamtamasyz etý sharalary ishki ister organdary basshylarynyń jiti baqylaýynda tur. Bul týraly búgin QR Ortalyq saılaý komıssııasynda ótken brıfıngte QR Іshki ister mınıstriniń birinshi orynbasary Marat Demeýov aıtty.

«Saılaý zańnamasyn buzý faktilerine qatysty aryz-shaǵymdar dereý qaralady. Saılaý zańy boıynsha polıtsııa qyzmetkeri daýys berý orny komıssııa tóraǵasynyń shaqyrýymen ǵana kire alady. Eger tártip buzylsa, ony qalpyna keltirgen soń dereý qaıtyp shyǵý kerek», - dedi ol.

Onyń atap ótýinshe, Іshki ister mınıstrligi jol qozǵalysy qaýipsizdigin de jiti baqylaýǵa alǵan. Saılaý komıssııalaryna qyzmet kórsetetin avtomashınalar men tehnıka quraldaryna tolyq tekserý júrgizgen. Jedel basqarý ortalyǵynyń beınebaqylaý kameralarynyń jaǵdaıyn qadalaǵaý úshin tehnıkalyq kómek te kórsetilýde.

«Qazirgi tańda ishki ister organdarynyń arnaıy mekemelerinde saılaý quqyna ıe 4 myń adam bar. Biz saılaý komıssııalarymen kelisip, olar úshin daýys berý ýchaskelerin ashtyq. Keıbir arnaıy mekemelerge daýys berý jáshikterin de qoıdyq. Іshki ister organdary saılaý ótkizý kúninde tolyq daıyn dep aıta alamyz. Al qoǵamdyq tártip pen qaýipsizdikti qamtamasyz etý sharalary jalǵasa beretin bolady. Bul máseleler ishki ister organdarynyń basshylarynyń da baqylaýynda tur», - dedi M.Demeýov.