M.Áshimbaev: Bul kún - batyrlyq pen batyldyqtyń, sabyr men tózimniń merekesi

NUR-SULTAN. QazAqparat - "Nur Otan" partııasy Tóraǵasynyń birinshi orynbasary Máýlen Áshimbaev barsha qazaqstandyqtardy Uly Jeńis kúnimen quttyqtady, dep habarlaıdy QazAqparat tilshisi.

"Bul kún - batyrlyq pen batyldyqtyń, sabyr men tózimniń, qajyr men qaırattyń merekesi jáne Otan úshin otqa túsken atalarymyz ben ákelerimizdiń erlikterine kórsetilgen qurmettiń belgisi. Elimizde sol bir surapyl jyldardyń zardabyn tartpaǵan otbasy kemde-kem. Birimizdiń atamyz, birimizdiń ákemiz, endi birimizdiń aǵamyz soǵysqa attanyp, Uly Jeńis kúnin jaqyndatty. Sondyqtan biz aldyńǵy býynnyń erlikterin eshqashan umytpaı, únemi óskeleń urpaqqa aıtyp, dáripteýimiz kerek", - dep jazdy ol Feısbýktegi paraqshasynda.

Sonymen qatar, ol Qazaqstannyń táýelsizdik alyp, egemen el bolýyna da ardagerlerdiń erlikteri men eńbekteriniń tıgizgen yqpaly orasan zor ekenine basa nazar aýdardy.

"Sol sebepti bul kúnniń eldik múdde turǵysyndaǵy mańyzy men máni tereń. Osynaý qasterli kúnmen barshańyzdy quttyqtaı otyryp, ár shańyraqqa amandyq pen bereke-birlik tileımin! Árdaıym aspanymyz ashyq bolyp, elimiz gúldenip, kórkeıe bersin!", - dep tilegin jetkizedi M.Áshimbaev.