LV Force qarjy pıramıdasy myńdaǵan adamdy aldap, 450 mln teńgeni qaltaǵa basqan

KÓKShETAÝ. QazAqparat - Aqmola oblysynda 450 mln teńgeden astam teńgege zalal keltirgen qarjy pıramıdasy anyqtaldy, dep habarlaıdy QazAqparat qarjylyq monıtorıng agenttigine silteme jasap.

Sońǵy ýaqytta elimizde qarjy pıramıda qyzmetine azamattardy tartý jaǵdaılary kóbeıip ketti.

Qarjy monıtorıngi agenttigi azamattarǵa QR Ákimshilik quqyq buzý kodeksiniń 150-babymen jáne QR Qylmystyq kodeksiniń 217-babymen qarjy pıramıdasyn jarnamalaý jáne olardyń qyzmetin júzege asyrý úshin ákimshilik jáne qylmystyq jaýapkershilik qarastyrylǵanyn eskertedi.

Qarjylyq monıtorıng agenttiginiń Aqmola oblysy boıynsha aýmaqtyq departamenti LV Force qarjy pıramıdasynyń zańsyz qyzmetiniń jolyn kesti.

Qabyldanǵan sharalardyń nátıjesinde Shymkent, Almaty qalalarynda jáne Shyǵys Qazaqstan, Batys Qazaqstan, Aqtóbe, Qyzylorda, Mańǵystaý oblystarynda LV Force qarjy pıramıdasynyń bólimsheleri joıyldy.

Qarjy pıramıdasyna 2000-nan astam senip qalǵan azamat tartylǵan. Kelgen shyǵyn 450 mln teńgeden asty.

Qazirgi ýaqytta alaıaqtyq shemanyń basty uıymdastyrýshysy 2 aıǵa qamaýǵa alyndy.