Lývrda qazaq óneriniń kórmesi ótedi
«Frantsııanyń Qazaqstandaǵy Tótenshe jáne Ókiletti Elshisi Dıde Kaness myrzamen kezdestim. Kezdesýde eki memleket arasyndaǵy mádenı jáne sport salasyndaǵy yntymaqtastyq pen aldaǵy jobalardy talqyladyq. Kún tártibindegi eń mańyzdylardyń biri, árıne, 2024 jylǵy Olımpıada taqyryby boldy.
Qarasha aıynda qos memleket basshylarynyń kezdesýinde 2025-2026 jyldary Frantsııada qazaq mádenıetiniń kúnderin ótkizý týraly sheshim qabyldandy. Búgin biz Lývrda qazaq óneriniń kórmesin, sondaı-aq artısterimiz ben shyǵarmashylyq ujymdarymyzdyń qatysýymen Parıjde aýqymdy kontsert ótkizý múmkindigin talqyladyq. Bul mádenıet qaıratkerleri úshin qundy tájirıbe bolady dep sanaımyn», - dep jazdy vedomstvo basshysy áleýmettik jelidegi paraqshasynda.
Óz kezeginde Kaness Frantsýz kınoındýstrııasy Qazaqstanǵa úlken qyzyǵýshylyq tanytyp otyrǵanyn aıtqan. Mysaly, Frantsııanyń kınomektepteri bizdiń stýdentter oqı alatyn jáne olarmen tájirıbe alatyn baǵdarlama ázirleýge daıyn. Al frantsýz kınoprokatshylary bizdiń kınoteatrlarmen tikeleı yntymaqtastyq ornatýǵa nıet bildirýde.
«Endi Frantsııada ótetin Olımpıadaǵa keletin bolsaq. Elshilik qazirdiń ózinde tórtjyldyqtyń basty sporttyq is-sharasyna arnalǵan túrli is-sharalar uıymdastyryp jatyr.
Mysaly, 14 naýryzda Olımpıada bastalardan 500 kún buryn Almatyda balalar arasyndaǵy «Álem aınalasyndaǵy estafeta» halyqaralyq jarysynyń kezeńi ótedi. Sondaı-aq, Elshi Almatyda dzıýdoshylar men karateshilerdiń demonstratsııalyq qoıylymdaryn, paralımpıadashylardyń qatysýymen ótetin is-sharany jáne Parıj Olımpıadasynyń baǵdarlamasyna engen breıkdans boıynsha týrnırdi uıymdastyrýǵa nıet bildirdi.
Osy oraıda mádenıet, týrızm jáne sport salasyndaǵy birlesken jumysymyz aldaǵy ýaqytta da kúsheıtiletinin atap ótkim keledi», - dep jazdy Ashat Oralov.
Foto:www.facebook.com/Ashat Oralov