Lýdomanııamen kúresýge baǵyttalǵan zań jobasynda ne usynylǵan?

ASTANA. QazAqparat – PІB janyndaǵy Parlamentarızm ınstıtýty Parlament Májilisimen ózara is-qımyl jospary sheńberinde oıyn bıznesi máseleleri boıynsha zań jobasyn ázirledi, dep habarlaıdy QazAqparat.

Zań jobasynyń maqsaty – qumar oıyndarǵa jáne bás tigýge qatysý kezinde azamattardy oıynǵa táýeldilikten (lýdomanııadan) qorǵaý, azamattar men olardyń otbasylary úshin oıynǵa táýeldiliktiń teris áleýmettik, ekonomıkalyq, quqyqtyq saldarynyń aldyn alý, oıyn bıznesi, lotereıa jáne lotereıa qyzmeti salasyndaǵy zańnamany jetildirý.

2021 jylǵy aqpanda Memleket basshysy Qasym-Jomart Toqaev Ulttyq qoǵamdyq senim keńesiniń besinshi otyrysynda lýdomanııa problemasyna nazar aýdardy.

«Sońǵy kezde jastar arasynda lýdomanııa, ıaǵnı qumar oıyndarǵa táýeldilik beleń alýda. Bul keselden qumarpazdardyń ózderi ǵana emes, olardyń otbasy, týystary men jaqyndary zardap shegedi. Jasóspirimderimiz zamanaýı tehnologııalardyń yqpalymen qumar oıyndaryna ońaı shyrmalatyn boldy. Biz jas urpaqty qumar oıynnyń zııandy yqpalynan jan-jaqty qorǵaýymyz kerek. Máseleni sheshý úshin jańa tásilderdi qoldaný qajet», - dedi.

Zań jobasy Qylmystyq kodekske, sondaı-aq «Oıyn bıznesi týraly», «Tólemder jáne tólem júıeleri týraly», «Jarnama týraly», «Mádenıet týraly», «Dene shynyqtyrý jáne sport týraly», «Lotereıalar jáne lotereıa qyzmeti týraly» Zańdarǵa ózgerister men tolyqtyrýlar engizýdi kózdeıdi.

Lýdomanııamen kúresýge baǵyttalǵan zań jobasynda ne usynylady?

1. Telekommýnıkatsııa jáne ınternet jelilerinde baǵdarlamalyq qamtamasyz etýdi paıdalana otyryp, zańsyz oıyn bıznesin uıymdastyrǵany úshin qylmystyq jaýapkershilik belgilenedi;

2. Boryshkerlerdiń biryńǵaı tiziliminde málimetteri bar jeke tulǵalar úshin qumar oıyndarǵa jáne bás tigýge qatysýǵa tyıym salý engiziledi;

3. Qazaqstan Respýblıkasynda oıyn bıznesi salasyndaǵy qyzmetpen aınalysý quqyǵyna lıtsenzııasy joq sheteldik býkmekerlik keńselerdiń, totalızatorlardyń ınternet-resýrstaryna tyıym salý jáne joǵarǵy deńgeıdegi ulttyq domeni bar, salyq zańnamasyna sáıkes tirkeý esebine qoıylǵandardan basqa, totalızatordyń jáne (nemese) býkmekerlik keńseniń elektrondyq kassalaryna tyıym salý engiziledi ;

4. Sot aktisi negizinde qyzmeti Qazaqstan Respýblıkasynyń aýmaǵynda zańsyz dep tanylǵan oıyn bıznesin sheteldik uıymdastyrýshylardyń tizbesi ázirlenedi, sondaı-aq osyndaı tulǵalardyń paıdasyna tólemderdi júzege asyrý boıynsha qyzmetter kórsetýge tyıym salý belgilenedi;

5. Ýákiletti organ bekitetin oıyn mekemesiniń, býkmekerlik keńseniń, totalızatordyń jumysynyń, mólsherlemelerdi qabyldaý jáne ótkiziletin qumar oıyndary (nemese) bás tigýdiń úlgilik erejeleri engiziledi;

6. Oıyn bıznesin uıymdastyrýshylar úshin ýákiletti organda oıyn mekemesiniń, býkmekerlik keńseniń, totalızatordyń jáne ótkiziletin qumar oıyndardyń jáne (nemese) bás tigýdiń jumys erejelerin kelisý mindeti belgilenedi;

7. Qumar oıyndarǵa jáne bás tigýge qatysýshylardy teris saldarǵa ákep soǵatyn qumar oıyndarǵa jáne bás tigýge qatysýdyń táýekelderi men zııany týraly mindetti túrde habardar etý engiziledi;

8. Oıyn mekemelerinde, býkmekerlik keńseler men totalızatorlardyń úı-jaılarynda mıkroqarjy uıymdarynyń, lombardtardyń ornalasýyna jáne jumys isteýine tyıym salý engiziledi;

9. Býkmekerlik keńseler men totalızatorlardyń jarnamasyn ornalastyrýǵa jáne taratýǵa qoıylatyn talaptar qatańdatylady;

10. Mólsherlemelerdi esepke alý ortalyǵynyń (MEAO) júıesi alynyp tastalady, onyń ornyna salyqtyq ákimshilendirýdi kúsheıtý kózdeledi;

11. Oıyn avtomattary zaldaryn ornalastyrý boıynsha talaptar qatańdatylady;

12. Kreatıvti ındýstrııalardy qoldaý qory qurylady;

13. Lotereıa operatorynyń qyzmetin aıqyndaý jáne toqtatý tártibi, sondaı-aq lotereıa operatoryna qoıylatyn biliktilik talaptary engiziledi;

14. «Lotereıa bıleti» uǵymy ózgertilip, «lotereıa túbirtegi» jáne «elektrondyq lotereıa bıleti» uǵymdary engiziledi;

15. Aqparattyq-telekommýnıkatsııalyq jelilerdi, onyń ishinde Internet jelisin, sondaı-aq baılanys quraldary men lotereıa termınaldaryn paıdalana otyryp, jedel lotereıanyń lotereıa bıletterin taratýǵa (satýǵa) tyıym salý engiziledi;

16. Lotereıa operatory úshin ýákiletti organda lotereıa ótkizý sharttaryn kelisý mindeti belgilenedi;

17. Lotereıa operatorynyń bólimshelerin (lotereıa ortalyqtaryn) quqyqtyq retteý belgilenedi;

18. Tırajdyq lotereıanyń júlde qoryn jıyrma tórt saǵat saıyn bir retten jıi emes utysqa salýǵa shekteý engiziledi;

19. Lotereıa bıletterin, elektrondyq lotereıa bıletterin taratýdy (satýdy), lotereıa termınaldaryn ornatýdy quqyqtyq retteý belgilenedi;

20. Lotereıa operatorynyń qyzmetin toqtatý negizderi belgilenedi.