Lýdomanııaǵa shaldyqqandardyń tek 8,3%-y qumar oıyndarǵa táýeldiligin moıyndaıdy

<p>ASTANA. KAZINFORM &ndash; Álemde eresekter arasynda qumar oıyndarǵa táýeldiliktiń taralýy 0,12 paıyzdan 5,8 paıyzǵa deıin jetedi. Bul týraly Parlament Májilisi janyndaǵy Qoǵamdyq palatanyń otyrysynda Densaýlyq saqtaý mınıstrligi Respýblıkalyq psıhıkalyq densaýlyq ǵylymı-praktıkalyq ortalyǵy bas dırektorynyń orynbasary Dáýlet Baıpeıisov aıtty.</p>

«Biz bul saladaǵy 24 zertteýge sholý jasadyq. Bul 2022 jylǵy meta-taldaý jáne onda tıisti nátıjeler jınaqtalǵan. Máselen, álemde eresekter arasynda lýdomanııanyń taralýy 0,12 paıyzdan 5,8 paıyzǵa deıin. Sonymen qatar, eresek adamdardyń shamamen 12,5% turaqty túrde oınaıdy», - dedi D. Baıpeıisov oıyn bıznesi men lotereıa qyzmetin retteý taqyrybyna arnalǵan otyrysta. 

Onyń aıtýynsha, lýdomanııa belgileri bar adamdardyń tek 8,3% ǵana qumar oıyndarǵa táýeldilikpen baılanysty problemalary bar ekenin moıyndaıdy.

«Osy matematıkalyq modeldeý arqyly bul halyqaralyq zertteý nátıjesin elimizdegi jaǵdaıǵa kóshirsek, mynadaı kórinis shyǵady: Qazaqstanda atalǵan problemanyń taralýy 442 myń adamǵa deıin jetýi múmkin. Onyń ishinde problemany moıyndaıtyndar - 36 myńǵa jýyq adam», - dedi Dáýlet Baıpeıisov.

Eske salsaq, jaqynda Parlament Májilisinde «Qazaqstan Respýblıkasynyń keıbir zańnamalyq aktilerine oıyn bıznesi, lotereıalar jáne lotereıa qyzmeti máseleleri boıynsha ózgerister men tolyqtyrýlar engizý týraly» zań jobasy tanystyryldy.

Elimizde 400 myńdaı adam býkmekerler men kazınolardyń turaqty klıentine aınalǵan.