LRT jobasyn 2 jyldyń ishinde aıaqtaýdy josparlap otyrmyz – Astana ákimi

ASTANA. QazAqparat – LRT jobasyn 2 jyldyń ishinde aıaqtaý josparlanyp otyr. Bul týraly elimizdiń áleýmettik-ekonomıkalyq damýy jónindegi keńeste Elorda ákimi Jeńis Qasymbek aıtty, dep habarlaıdy QazAqparat tilshisi.

«Bıyl qala ishinde jáne elordanyń aınalasyndaǵy jasyl beldeýde mıllıonǵa jýyq jasyl jelek otyrǵyzýdy josparlap otyrmyz. Jyl basynan beri 733 myń sharshy metr turǵyn úı salyndy. Bul ótken jyldyń tıisti kezeńimen salystyrǵanda 22 paıyzǵa artyq. Jyl sońyna deıin barlyǵy úsh mıllıonnan astam sharshy metr turǵyn úıdi paıdalanýǵa berýdi josparlap otyrmyz. Bul - 40 myńnan astam páter, onyń ishinde halyqtyń áleýmettik osal toptary úshin memleket bólgen - 6 myń páter bar. Sonymen qatar, bıyl «Nurly jer» baǵdarlamasynyń ekinshi kezeńi aıasynda salynyp jatqan barlyq problemalyq úlestik nysandardy aıaqtap, paıdalanýǵa berýdi josparlap otyrmyz», - dedi qala basshysy.

Onyń atap ótýinshe, bıyl naýryzda qalalyq jańǵyrtý baǵdarlamasy 2030 jylǵa deıin ózektendirildi, nátıjesinde 206 apatty úıdi kóshirý josparlanýda.

«LRT-niń birinshi iske qosý kesheniniń qurylys jumystary qaıta jandandy. Jobany 2 jyldyń ishinde aıaqtaýdy josparlap otyrmyz. Sonymen qatar bıyl uzyndyǵy 55 shaqyrym 72 kóshege qurylys-jóndeý jumystaryn júrgizemiz jáne Táýelsizdik kópiri qurylysyn aıaqtaımyz», - dedi Jeńis Qasymbek.