LRT jelisi Almaty - 3 jańa vokzaly men áýejaıǵa deıin salynady

ALMATY. QazAqparat- Bas jospar qoǵamdyq kólik dálizderiniń qýatyna qaraı aýmaqtardy damytýǵa baǵyttalǵan tranzıttik-baǵdarlanǵan damý (TBD) qaǵıdatyna negizdeledi. Ony naqty iske asyrý úshin magıstraldyq qoǵamdyq kólik BRT, LRT, metro dálizderin uıymdastyrý qajet, dep habarlaıdy QazAqparat tilshisi.

Almaty qalasynyń jańa Bas josparyn ázirleýshi, kólik sarapshysy Roman Barabanovtyń aıtýynsha, TBD qoǵamdyq kóliktiń qoljetimdiligin qamtamasyz etýge jáne jeke avtokólikpen júrý qajettiligin aıtarlyqtaı azaıtýǵa múmkindik beredi.

«Metro, BRT, LRT (jeńil relsti tramvaı), sondaı-aq bólingen jolaqtar qalanyń belgili bir jerlerinde qalalyq jáne aýdandyq mańyzy bar kólik-aýystyrý toraptarymen (KAT), jergilikti baılanystar deńgeıinde ózara baılanysty bolady, sondaı-aq olarǵa múmkindiginshe veloınfraqurylym (velojoldar, velojolaqtar) jetkiziledi. Sonymen qatar, KAT birqatar avtobýs marshrýttaryn ońtaılandyrýǵa múmkindik beredi»,- dedi ol.

Sarapshynyń sózinshe, tolyqqandy kólik-aýystyrý toraptary Almaty - 2 vokzalynda paıda bolady. Bul Raıymbek batyr metro stantsııasyn qoljetimdi etýge, qala mańyndaǵy avtobýstardyń baǵyttaryn Qonaev qalasyna, sondaı-aq Qazaqstannyń basqa qalalaryna elektr poıyzymen ketýge múmkindik bermek. Sondaı-aq Almaty -1 vokzalynyń janynda metroǵa aýysýǵa jaǵdaı jasalady. Al, uzarǵan jeliniń ózi BRT jáne LRT-men túıisetin bolady.

Sonymen qatar, sarapshy jeńil relsti júrdek kólikter jobasy qalaǵa kópten beri qajet ekenin aıtty.

«Eń aldymen LRT Tóle bı kóshesi arqyly ótedi. Sodan keıin tramvaı Orbıta yqsham aýdanyna, tuńǵysh prezıdent saıabaǵyna, batysta «Barlyq» avtovokzalyna, Boraldaı ındýstrııalyq aımaǵyna, Almaty-3 temirjol vokzalyna (bolashaqta salý josparlanǵan), megapolıstiń tómengi jaǵymen áýejaıǵa barady»,- dedi ol.

Aıta keteıik, QR Úkimeti Almaty qalasynyń 2040 jylǵa deıingi Bas josparyn bekitti.