Louis Vuitton-nan shaqyrtý alǵan qazaqstandyq: Jobamdy satyp alýǵa usynystar boldy
Atap aıtqanda, «Bes tas», «Qumar», «Aǵash úı» bestemshesi, «Tumar» bestemshesi, «Toǵyzqumalaq» oıyndary qazaqtyń oıý órnegi bar fýnktsıonaldy qorjyn túrinde usynylǵan.
Qazaqstandyq ónerpazdyń kıiz úı túrindegi oıyndaryna áıgili Louis Vuitton sán úıi qyzyǵýshylyq tanytty. Qazir ol alys saparǵa qyzý daıyndalyp jatyr. Talantty jerlesimizdiń shetelge is-saparyn uıymdastyrýdy «Kazakh Tourism» ulttyq kompanııasy moınyna aldy.
«Aldymen aıtarym, men kásibı maman emespin. Sán, dızaınǵa qatysym joq. Bul – meniń hobbıim. Sonymen qatar, shyǵarmashylyqty bıznes úshin bastaǵan joqpyn. Kishkene de bolsa halyqqa paıdam tıse degen oı boldy. Biraq, ýaqyt óte kele qarjydan qınalǵandyqtan, súıikti isimdi kásipke aınaldyrýǵa týra keldi. Bir oıyn taqtasyn jasaýǵa shamamen bir aıǵa jýyq ýaqyt ketedi. Suranys joǵary, ásirese Almatydan jıi túsedi. Jýyrda elordadan tapsyrys boldy, búkil oıynymdy satyp aldy», - dedi Aınur Polatova elordada ótken baspasóz máslıhatynda.
Jerlesimiz ıdeıasyn kásip túrinde emes, ulttyq brend retinde odan ári damytqysy keledi. Sol úshin de búginde patentteý jaǵyn qarastyryp jatyr.
«Jumysymnyń avtorlyǵyn zańdastyrý, patentteý jaǵyn qazirden qarastyryp jatyrmyn. Árıne, Louis Vuitton sán úıimen kollaboratsııa jasaǵan jaqsy. Degenmen, avtorlyq quqyq – óte mańyzdy dúnıe. Sol sebepti, búginde «Qazpatent» ulttyq zııatkerlik ınstıtýtyna ótinish berip qoıdym. Basynda qıyn bolǵany ras. Kásibimdi damytý úshin nesıe de aldym. Bárine qol silteı salǵym kelgen sát boldy, tipti satqym da keldi. Onyń ústine, meniń jobamdy tolyqtaı satyp alǵysy kelip, somasyn usynǵandar da boldy. Biraq, ýaqyt óte kele bastaǵan avtorlyq isimdi tastamaý kerektigin túsinip, jalǵastyrdym», - deıdi ol.
Eske salaıyq, kıiz úı túrinde sómke jasaıtyn qazaqstandyqtyń jobasyna Louis Vuitton sán kompanııasynyń qyzyǵýshylyq tanytqany týraly habarlaǵan edik.