Lotos gúlin kenepke beınelegen sýretshiler týyndylaryn Atyraý mýzeıine tapsyrdy

ATYRAÝ. QazAqparat – Lotos gúlin kenepke beınelegen sýretshiler týyndylaryn Atyraý mýzeıine tapsyrdy, dep habarlaıdy QazAqparat tilshisi.

Atyraýda «Sý betindegi sulýlyq» ataýymen sýretshilerdiń respýblıkalyq planeri ótti. Oǵan Almaty, Qyzylorda, Aqtóbe jáne Atyraýdan 10 sýretshi qatysty.

Oblystyq mádenıet, tilderdi damytý jáne arhıv isi basqarmasynyń basshysy Ábil Jolamanovtyń aıtýynsha, «Sý betindegi sulýlyq» planeri alǵash ret ótkizilgen.

«Bul planerdi ótkizý kezinde birneshe maqsat kózdeldi. Birinshiden, Atyraý oblysynyń Reseımen shekarasyndaǵy Qıǵash ózeninde ósetin, Qyzyl kitapqa engen lotos gúlin kenep betine túsirý. Ekinshiden, sý betindegi sulýlyqty boıaýlar úndestigimen beıneleý arqyly ishki týrızmdi damytýǵa úles qosý. Úshinshiden, týǵan ólkege súıispenshilikti arttyrý. Tórt óńirden qatysqan sýretshiler bir-birimen tájirıbe almasty», -deıdi Ábil Jolamanov.

«Sý betindegi sulýlyq» atty sýretshilerdiń respýblıkalyq plenerine qatysýshylarǵa 250 myń teńgeniń stıpendııasy tabys etildi.

QR Sýretshiler odaǵynyń múshesi, halyqaralyq jáne respýblıkalyq kórmelerge qatysqan almatylyq qylqalam sheberi Maksım Vedernıkovtiń aıtýynsha, lotos alqaby – týrıstik brendke suranyp turǵan meken.

«Qazaqstanda týrısterdi qyzyqtyratyn tabıǵı oryndar kóp. Biraq, sý ústinde ósip turǵan lotos sekildi ádemi alqapty alǵash ret kórdim. Shyn máninde sý betindegi sulýlyqty kózben kórý kerek», -dedi Maksım Vedernıkov.

Qyzylordalyq sýretshi Dýlat Aıtbaev Sh.Sarıev atyndaǵy kórkemsýret jáne qoldanbaly sándik óner mýzeıine erekshe týyndysyn tapsyrdy. Ol lotos gúlin salýǵa kúrishti paıdalanǵan.

Planerge qatysqan sýretshiler lotos alqabyn beınelegen 21 týyndysyn Sh.Sarıev atyndaǵy kórkemsýret jáne qoldanbaly sándik óner mýzeıiniń qoryna tapsyrdy.

Eske sala ketelik, budan buryn qazaqstandyq sýretshiler Qıǵash ózenindegi alyp gúldi kenepke beınelep jatqanyn habarlaǵan bolatynbyz.