Londonnan sálem: Erjan Maksım men ulybrıtanııalyqtar qazaqstandyqtarǵa vıdeo joldady

LONDON. QazAqparat – Ulybrıtanııanyń qazaqstandaǵy Elshiligi Facebook-tegi resmı paraqshasynda osy kúnderi Londonda júrgen qazaqstandyq jas ánshi Erjan Maksımniń jáne atalmysh eldegi ózge adamdardyń Qazaqstandy Táýelsizdik merekesimen quttyqtaǵan vıdeolaryn ornalastyrdy, dep habarlaıdy QazAqparat.

«Sálem, qurmetti dostar! Londonnan jalyndy sálem! Kelip jetken Táýelsizdik merekesimen shyn júrekten quttyqtaımyz! Otbasylaryńyz árqashan aman bolsyn. Elimiz aman, jurtymyz tynysh bolsyn!», - dep lebizin bildirdi Erjan.

Sondaı-aq elshiliktiń akkaýntynda ulybrıtanııalyqtar men osy elde júrgen túrli el azamattarynyń Qazaqstandy Táýelsizdik merekesimen qazaq tilinde quttyqtaǵan vıdeosy jarııalandy. Olardyń arasynda jastar men balalar bar.

«Qurmetti qazaqstandyqtar, sizderdi Táýelsizdik kúnimen shyn júrekten quttyqtaımyz. Sizderge zor densaýlyq, tynyshtyq, molshylyq, baqyt, baq-dáýlet, uzaq ǵumyr, bereke-birlik, tileımiz. Eńbekterińiz jemisti bolsyn. Mereke qutty bolsyn! Alǵa Qazaqstan!», - delingen onda.