Londonǵa baratyn toǵyz boksshy - QAZAQSTANNYŃ ÚKІLEGEN TOǴYZ ÚMІTІ

ASTANA. 15 sáýir. QazAqparat - Buıyrtsa tórt jylda bir ret keletin XXX  jazǵy Olımpıada oıyndary 27 shilde kúni Ulybrıtanııa astanasy Londonda alaýyn jaǵyp, 12 tamyz kúni óz máresine jetpek. Osy oraıda atalǵan dúbirli doda bastalǵanǵa deıingi ýaqytta «QazAqparat» agenttigi ár aptanyń jeksenbisinde Olımpıdada Qazaqstan namysyn qorǵaıtyn sportshylar jaıynda maǵlumat beretin boldy. Búgin biz Londonǵa baratyn bokstan erler komandasynyń sportshylarymen tanystyramyz.

Aıta keteıik, Astanada ótken bokstan Azııa aımaǵynyń lıtsenzııalyq týrnıri jaqynda aıaqtalyp, onyń qorytyndysy boıynsha jerlesterimiz úsh altyndy jeńip aldy. Sonymen qatar, London Olımpıadasynyń joldamasy sarapqa salynǵan atalmysh dodanyń qorytyndysy boıynsha bizdiń boksshylarymyz úsh lıtsenzııany qanjyǵaǵa baılady. Sonymen Qazaqstannyń London Olımpıadasyna bokstan qol jetkizgen joldama sany 9-ǵa jetti. Eske salsaq, Astanadaǵy London Olımıadasynyń joldamasy sarapqa salynǵan týrnırdiń sońǵy kúninde jerlesimiz 49 keli salmaqta óner kórsetken Birjan Jaqypov aqtyq aıqasta japonııalyq Naoıı Inoýıden basym túsip, osy salmaqqa tigilgen lıtsenzııaǵa qol jetkizgen bolatyn. Birjan úsh raýndtyń qorytyndysy boıynsha qarsylasyn 16:11 esebimen utty.

Al 52 keli salmaqtaǵy sańlaǵymyz Іlııas Súleımenov Mońǵolııanyń Týgstsogt Nıambaıaryn jeńdi. Eske sala keteıik, Іlııas osy salmaq boıynsha fınalǵa deıin-aq ózin olımpıadalyq lıtsenzııamen qamtamasyz etip qoıǵan. Budan bólek, Azııa týrnırindegi úshinshi altyndy Danııar Eleýsinov ıelendi. 64 kelide onyń qarsylasy túrkimenstandyq Serdar Hýdaıberdıev aqtyq aıqasqa shyqpaı qalǵan bolatyn. Sóıtip, London Olımpıadasynda Qazaqstannyń boks quramasy 10 salmaq dárejesiniń 9-ynan baq synaıtyn bolady. Aıta keteıik, bokstan ulttyq quramanyń bas bapkeri Myrzaǵalı Aıtjanovtan Londonǵa baratyn ár boksshy jaıynda ózindik pikirin jazyp alýdyń sáti tústi. Osy oraıda, atalǵan tartysty dodaǵa Alash jurty úkilep úmit artyp otyrǵan bahadúrlerdiń tizimin kópshiliktiń nazaryna usynýdy jón kórdik.

Birjan Jaqypov 1984 jyldyń 7 shildesinde dúnıege kelgen. Ol 49 keli salmaq dárejesinde 2012 jylǵy London Olıpıadasy oıyndary lıtsenzııalyq týrnırin jeńip aldy. Halyqaralyq dárejedegi sport sheberi bolyp tanylǵan Birjan Ońtústik Qazaqstan oblysynan. Ol Álem chempıonatynyń qola júldegeri (2005 jyly), bokstan Kýba Olımpıadasynyń (2008 jyly) jeńimpazy, Azııa oıyndarynyń kúmis júldegeri (2010 jyly).

 Ulttyq quramanyń bas bapkeri Myrzaǵalı Aıtjanovtyń aıtýynsha, Birjan ulttyq qurama sapyndaǵy tájirıbeli boksshylardyń biri. «Ol buǵan deıin álemniń úsh dúrkin chempıony Zoý Shımınem (Qytaı) atty bilekti boksshymen kezdesip, oǵan ese jiberip otyrdy. Budan basqa Birjan eshkimge de utylyp kórgen emes. Alaıda, sońǵy ýaqytta onda taktıkalyq qatelikter qylań bere bastady. Ótken Azııalyq lıtsenzııalyq týrnırde ol doda barysynda jaqsy oıyn órnegin kórsete almady. Biraq ta upaı sany boıynsha barlyq qarsylastaryn utty. Menińshe ol qatty qobaljyǵan sekildi. Áli alda úsh aı ýaqyt bar. Lıtsenzııany utyp aldy. Endi ol maqsatty túrde daıyndalady degen pikirdemin. Birjan taǵy da osy salmaqta myqtylardyń biri ekenin dáleldeýi tıis»,-dedi bas bapker.

  Іlııas Súleımenov te Azııalyq irikteý týrnırindegi sheshýshi aıqasta Týgstsogt Nıambaıardy (Mońǵolııa) utty - 18:14. Іlııas 52 kelige deıingi salmaqta óner kórsetpek. Sport sheberi dárejesi bar bul boksshymyz 1990 jyly týǵan. Astana atynan shyǵyp júrgen sportshy Qazaqstan chempıony (2010 jyly), «QR Prezıdenti Kýbogi» halyqaralyq týrnıriniń fınalısi (2010 jyly), Azııa chempıonatynyń fınalısi (2011 jyly) bolyp tanyldy.

M. Aıtjanov : «Іlııas ótken jylǵy jeltoqsanda Qaraǵandyda bolǵan halyqaralyq týrnırdegi jeńisi úshin Azııalyq lıtsenzııalyq týrnır sapyna endi. Ol bizdiń úmitimizdi aqtady. Keıbir kemshilikter bar, ıaǵnı úlken tájirıbe jınap úlgergen joq, alaıda onda bul salmaqta kóshbasshy bolý maqsaty bar. Bizdiń oıymyzsha,  osy tańdaýda qatelesken joqpyz. Biz onyń sheberligin áli de arttyra túsemiz. Menińshe, Olımpıadaǵa qaraı ol qajetti biliktiligin shyńdaı túsedi».

  Ǵanı Jaılaýov 60 keli salmaqta óner kórsetip júrgen bul boksshymyz 1985 jyldyń 3 tamyzynda dúnıege kelgen. Sporttyq ataǵyna toqtalatyn bolsaq, ol halyqaralyq sanattaǵy sport sheberi. Jambyl oblysynan. Jeke jattyqtyrýshysy Nurlan Aqúrpekov.  Ǵanı Azııa chempıonatynyń qola júldegeri (2009 jyly), Stýdentter arasyndaǵy álem chempıonatynyń kúmis júldegeri (2010 jyly), sondaı-aq Álem chempıonatynyń qola júldegeri (2011 jyly). Lıtsenzııany ótken jyly Bakýdegi Álem chempıonatynda 3 oryn alǵany úshin qanjyǵasyna baılady.

  M. Aıtjanov: «Ǵanı Jaılaýov bolashaǵy bar boksshylardyń biri. Ol myǵym ári shydamdy sportshy. Ol qarsylastar úshin óte yńǵaısyz boksshy. Sebebi, saıys kezinde onda eshkimge uqsamaıtyn ózindik urys tásili bar. Kezinde ol eki dúrkin Olımpıada chempıony Alekseı Tışenkony jeńip júrgen. Óz degenin oryndaıtyn boksshy».

 
Qanat Ábýtálipov óziniń olımpıadalyq joldamasyn 2011 jyly Qytaıda ótken bokstyń (WSB) Álemdik serııadaǵy chempıonatynda utyp aldy. Ol 1983 jyly 22 naýryzda Qaraǵandy oblysynyń Barshyn aýylynda dúnıege keldi. Elimizdiń qurama komandasy atynan 2000 jyldan beri shyǵyp keledi. Bokstan halyqaralyq sanattaǵy sport sheberi, 2002 jylǵy álem kýboginiń fınalısi, birneshe márte Qazaqstannyń chempıony atanǵan, Azııa chempıony, 2003 jylǵy Ortalyq Azııa oıyndarynyń chempıony, álem chempıonatynyń júldegeri.

  

M. Aıtjanov: «Qanat tájirıbeli boksshy. Kóp jyldary boıy úlken sharshy alańda tartysqa túsip júr. Óziniń joldamasyn ol «Astana Arlans» komandasy sapynda jeńip aldy. Qazirgi kezde ol qurama sapynda jáne aldaǵy dodaǵa kúsh-jigerin jınap jatyr».

 

  

Danııar Eleýsinov 21 jastaǵy astanalyq sportshy. Halyqaralyq sanattaǵy sport sheberi. 64 keli salmaq dárejesinde el namysyn qorǵaıtyn bolady. Ol Qazaqstan chempıony (2010-2011 jyldary), Azııa oıyndarynyń chempıony (2010 jyly). Danııar joldamany jaqynda elordada ótken  Azııalyq irikteý týrnırinde qanjyǵasyna baılady.

  

M. Aıtjanov: «64 keli salmaqta sharshy alańǵa shyǵatyn bul boksshy bolashaǵynan úmit kúttiretin sportshylardyń biri. Danııar óte saýatty boksshy jáne ol saıys kezinde ár qadamyn eseptep jasaıdy, sondaı-aq barlyq qashyqtyqta jumys isteı alady. Ámbebap-boksshy. Biz oǵan óte úlken úmit artyp otyrmyz. Sharshy alańda ol kez kelgen qarsylaspen jeńis jolynyń kiltin taba alady».

 

Serik Sápıev Qaraǵandy oblysynyń týmasy. 28 jastaǵy Serik sportpen 11 jyl aınalysyp keledi. Ony bastapqydan jeke jattyqtyrýshysy Aleksandr Strelnıkov tárbıelep kele jatyr.

Seriktiń nátıjelerine toqtalatyn bolsaq, ol eki márte Álem chempıony (2005, 2007 jyly), Azııa chempıony (2007, 2009 jyly), Azııa oıyndarynyń chempıony (2010 jyly) atanǵan. Sportqa eńbegi sińgen sheber atanǵan ol 69 keli salmaqta tartysqa túspek. Joldamany ótken jyly Bakýdegi Álem chempıonatynda ekinshi oryndy ıelengeni úshin aldy.

M. Aıtjanov: «Serik tájirıbeli ári senimdi boksshylardyń biri jáne komanda kapıtany bolyp tabylady. Komandanyń sapyndaǵy sportshylar ony úlgi tutady. Menińshe, Serik sekildi eńbekqor sportshylar kóp emes. Ol boksqa bar kúsh-jigerin salyp daıyndalady. Baǵy jansa ol Olımpıada chempıony bolýy tıis».

 

  

Danabek Sýjanov Bakýde ótken Álem chempıonatynda 75 keli salmaqqa deıingi dárejede olıpıadalyq joldamany jeńip aldy. 27 jastaǵy boksshy halyqaralyq sanattaǵy sport sheberi, Qazaqstan chempıony (2010, 2011 jyly) jáne Azııa oıyndarynyń qola júldegeri (2010 jyly).

M. Aıtjanov: «Danabek bul salmaqta Bahtııar Artaevtan keıin kóshbasshy atandy. 2011 jyly ol Qazaqstan chempıonatyn biliktilikpen utty. Barlyq halaqaralyq týrnırlerge qatysyp, jeńimpaz atandy. Alaıda, osy saıystarda úshinshi oryndarda alyp júr. Menińshe, oǵan sál qataldyq kerek. Osy minezin qaırap alsa, ol Olımpıadaǵy tolyǵymen daıyn bolmaq».

 

Ádilbek Nııazymbetov Bakýde bokstan bolǵan Álem chempıonatynda Qazaqstan úshin birinshi olımpıadalyq joldamany taza nokaýt arqyly utyp aldy. 21 jastaǵy aqtaýlyq boksshy sportqa eńbegi sińgen sheber atanǵan. Ol 2007 jyly halyqaralyq týrnırde 1 oryndy, 2008 jyly respýblıkalyq týrnırde 1 oryn, osy jyly «Azov teńizi kýbogi» halyqaralyq saıysynda 1 oryndy, 2009 jyly «Jibek joly» halyqaralyq týrnırinde 1 oryndy ıelendi. Londondaǵy dodada Ádilbek 81 keli salmaqta tartysqa túsedi.

 

M. Aıtjanov: «Menińshe, ol kommýnıkabeldi, ár qadamyn esepteı alatyn, sondaı-aq tehnıkalyq turǵyda saýatty boksshy. Bizdiń oıymyzsha, Bakýge ony ertip barǵanda qatelesken joqpyz. Bul saıysta Ádilbek kúmis júldeni aldy. Oǵan sál-pál daıyndyq jetispedi. Menińshe, aldaǵy ýaqytty ony fızıkalyq turǵyda shyńdaı túsemiz. Ol Londonda joǵary nátıje kórsetýi tıis».

 

Ivan Dychko 91 keli salmaqtan joǵary dárejede sharshy alańǵa shyqpaq. Qostanaı oblysyn tanystyryp otyrǵan 21 jastaǵy bul sportshy halaqaralyq sanattaǵy sport sheberi. Onyń Vladımır Shaırer, Sapabek Muqyshev atty eki jattyqtyrýshysy bar. Ivan 2008 jyly jastar arasyndaǵy álem chempıonatynyń fınalısi, 2010 jyly Azııa oıyndarynyń kúmis júldegeri, 2011 jyly Álem chempıonatynyń qola júldegeri atandy.

 

 M. Aıtjanov: «Ivannyń boıy men qolynyń uzyndyǵy jaǵynan barlyǵy jaqsy. Oǵan tek fızıkalyq jáne psıhologııalyq daıyndyq jetispeıdi. Biz ony bul baǵytta daıarlap jatyrmyz. Jarystarda oǵan myqty sportshylarmen tartysqa shyǵaýǵa múmkindik berip júrmiz. Menińshe, ol Olımpıadada nátıje kórsete alady. Adamdar Londonǵa tym jas sportshylardy apara jatyr dep aıtýda. Máselen, Muhammed Álı Olımpıadany 17 jasynda jeńgen edi. Al Ivan 22 jasqa jaqyndady. Jalpy boksta 18 jastan keıingi sportshylarǵa jas dep aıtpaıdy. Barlyǵy da eresekter».

 

 Atap aıtqanda, joǵaryda atalǵan boksshylardyń barlyǵy bıylǵy jyly 30 sáýir men 6 mamyr aralyǵynda Almatyda «QR Prezıdenti Kýbogi» halyqaralyq týrnırine qatysýǵa bel býyp otyr. Bul aıtýly saıys London Olımpıadasy aldynda joldamaly bolǵan boksshylarymyzdy taǵy da shyńdaı túsedi dep topshylap otyrmyz. Aldaǵy 2012 jylǵy XXX  Olımpıadanyń bastalýyna 100 kúndeı ýaqyt qaldy. Londanǵa Qazaqstan 9 joldamamen  boksshylardy aparatyn bolady. Bul 9 boksshy - Ulybrıtanııa jerinde elimizdiń Kókbaıraǵyn jelbiretip, Ánuranyn shyrqatýǵa qaýqarly 9 úmit.