Londondaǵy taldaý ortalyǵynda Qazaqstannyń Táýelsizdik jyldaryndaǵy jetistigi talqylandy

LONDON. QazAqapart - Halyqaralyq saıasatty zertteýmen aınalysatyn brıtanııalyq «Genrı Djekson qoǵamy» taldaý ortalyǵynda Qazaqstannyń Táýelsizdik jyldaryndaǵy jetistikteri talqylandy. Negizgi spıkerler qatarynda qos eldiń depýtattary jáne Qazaqstannyń Ulybrıtanııadaǵy Elshisi Erlan Ydyrysov boldy, dep habarlaıdy QazAqparat tilshisi.

Qazaqstanmen yntymaqtastyq jónindegi Jalpypartııalyq parlamenttik toptyń tóraǵasy, Ulybrıtanııa Parlamenti qaýymdar palatasynyń múshesi Bob Stıýart elimizdiń áleýmettik-ekonomıkalyq jáne qoǵamdyq-saıası salalaryndaǵy jetistikterine toqtaldy. Ol Qazaqstannyń Ortalyq Azııada adam quqyqtaryn qorǵaýǵa, beıbitshilik pen turaqtylyqty nyǵaıtýǵa baǵyttalǵan jumystaryn joǵary baǵalap, «Astana» halyqaralyq qarjy ortalyǵynyń óńirge ınvestıtsııalar tartýdaǵy aıryqsha rólin atap ótti.

B.Stıýart sondaı-aq, saıası jáne ekonomıkalyq yryqtandyrý protsesteri arqyly Qazaqstannyń tereń jáne oń ózgeristerge qol jetkizgenin atap ótti. Ol Ulybrıtanııanyń senimdi dosy jáne áleýeti zor saýda seriktesi retinde qaralatyn Qazaqstanmen jan-jaqty baılanystardy odan ári nyǵaıtýdyń mańyzdylyǵy týraly málimdedi.

Qazaqstan Respýblıkasy Parlamenti Májilisiniń depýtaty Zúlfııa Súleımenova, konferentsııaǵa onlaın qosylyp, memleketti odan ári demokratııalandyrýǵa jáne saıası júıeni jańǵyrtýǵa baǵyttalǵan eldegi reformalar týraly egjeı-tegjeıli baıandady.

«2019 jyldyń maýsym aıynda Qasym-Jomart Toqaev Prezıdent bolyp saılandy. Ol óziniń saıası kózqarasy sabaqtastyq, ádilettilik jáne progress formýlasyna negizdeletinin, keıinirek «Kúshti prezıdent – Yqpaldy Parlament – Esep beretin Úkimet» tujyrymdamasymen tolyqtyrylatynyn atap ótti. Prezıdenttiktiń eki jyly ishinde Q.Toqaev Qazaqstandaǵy saıası jańǵyrtýdy kezeń-kezeńimen júzege asyrýǵa baǵyttalǵan saıası reformalardyń tórt paketin usyndy», - dedi ol.

Konferentsııanyń basqa qatysýshylary eldiń halyqaralyq arenadaǵy jetistikterin jáne onyń qazirgi zamanǵy óńirlik jáne jahandyq protsesterge belsendi qatysýy týraly sóz qozǵady.

Sondaı-aq, is-shara barysynda qatysýshylar Qazaqstan-Brıtan áriptestigi men saýda yntymaqtastyǵynyń aǵymdaǵy jaı-kúıi men damý perspektıvalaryn, atap aıtqanda, 2022 jyly strategııalyq áriptestik pen yntymaqtastyq týraly ekijaqty kelisimge qol qoıý máselesin talqylady.

Onlaın jáne oflaın formatta ótken konferentsııaǵa parlamentarııler, jýrnalıster, sondaı-aq Ulybrıtanııanyń jetekshi taldaý jáne zertteý ortalyqtarynyń sarapshylary qatysty.

«Qazaqstannyń josparly ekonomıkadan bas tartyp, naryqtyq ekonomıkaǵa kóshý kezeńi erekshe tań qaldyrady. 30 jyl ishinde elderińiz jas memleketten batyl damyp kele jatqan ekonomıkasy, turaqty ishki jáne syrtqy saıasaty bar halyqaralyq qaýymdastyqtyń bedeldi múshesine deıingi joldy laıyqty júrip ótti», - dedi konferentsııa moderatory, «Genrı Djekson qoǵamy» taldaý ortalyǵynyń ókili Sem Eshvort-Heıs.