Londondaǵy qazaqstandyqtar da saılaýǵa belsene qatysýda
Saılaýshylardyń qatarynda tek London qazaqtary ǵana emes, Ulybrıtanııanyń túkpir-túkpirinde ýaqytsha nemese turaqty turyp jatqan otandastarymyz da bar. Daýys berýshiler arasynda týrıster de kóp. Birikken Koroldikte saıahattap júrgen otandastarymyz azamattyq boryshyna jaýapkershilikpen qarap, elshilikke at basyn burýda. Bul rette saılaý ýchaskesi komıssııasynyń tóraǵasymen jáne saılaýshylardyń birimen áńgimelesken edik.
«Búgin London ýaqyty boıynsha tańǵy saǵat 7-den Qazaqstan Respýblıkasynyń Elshiligi janyndaǵy №244 saılaý ýchaskesi bizdiń búkil azamatarymyzǵa ashyq. Demalys kúnine qaramastan, tańerteńnen bastap, bizdiń otandastarymyz saılaýǵa belsendi qatysyp jatyr. Olardyń kópshiligi stýdentter men jumysshylar, sportshylar, sondaı-aq Ulybrıtanııaǵa is-saparmen kelgen azamattar. Bıýlletender sanaýdan ótkennen keıin saılaý nátıjeleri Londonnan Astanaǵa jiberiletin bolady», deıdi №244 saılaý ýchaskesi komıssııasynyń tóraǵasy Mıraz Ańdabaev.
«Men Bolashaq baǵdarlamasy boıynsha Queen Mary ýnıversıtetinde magıstratýrada bilim alýdamyn. Búgin London tórinde ótip jatqan saılaýǵa ózimniń saıası kózqarasymdy bildirý úshin arnaıy keldim. Meniń oıymsha, árbir Qazaqstan azamaty, ásirese jastar úshin saıası belsendilik tanytý óte mańyzdy. Halqymyzdy tolǵandyratyn máselelerdi eskerip, múddesin qorǵaıtyn adamdar saılanatynyna senimdimin. Jalpy saıası naýqan joǵary deńgeıde ótip jatyr», deıdi QUEEN MARY ýnıversıtetiniń magıstranty Elnar Sákenova.
Parlament depýtattaryn saılaýǵa 400-den astam daýys berýshi keledi degen boljam bar. Sheteldik ýchaskelerdegi saılaýshylar tek partııalyq tizim boıynsha ǵana daýys beredi. Otandastarymyzdyń qaýipsizdigin qamtamasyz etý maqsatynda elshilik jergilikti polıtsııamen yntymaqtastyqta jumys istep jatyr. Bıylǵy jyldyń bir ereksheligi saılaý Naýryz merekesi qarsańynda ótýde. Sondyqtan kelýshilerge elshilik tarapynan ulttyq taǵamdar usynylyp jatyr. Astana men London arasyndaǵy 6 saǵattyq ýaqyt aıyrmashylyǵyna baılanysty Tumandy Albıondaǵy saılaý Qazaqstanǵa qaraǵanda keshirek bastalyp, keshirek aıaqtalady. Saıası naýqannyń máre syzyǵyna jetýine áli 11 saǵatqa jýyq ýaqyt bar.