Londondaǵy orta mektepte qazaq mádenıeti tanystyryldy
Sara-Djeın Kennedı aǵylshyn tiliniń muǵalimi. Búgin ol ózi bilim beretin qazaq oqýshylarynyń mádenıetimen etene tanysty. Ulttyq taǵamdardan aýyz tıip, tipti qamzol men sáýkele kıdi.
«Ádette mektep formasyn kıip kelgen oqýshylarymyzdyń qaı eldiń ókili ekenin keıde ańǵara bermeımiz. Búgingi sharanyń arqasynda Qazaqstannyń salt-dástúrleri týraly bilip jatyrmyn», — deıdi bastaýysh synyp muǵalimi Sara-Djeın Kennedı.
Ulybrıtanııa mektepterinde oqý jyly shildeniń sońynda aıaqtalady. Jazǵy kanıkýl aldyndaǵy aıtýly sharalardyń biri osy Ulttar kúni.
«Baýyrsaq óte dámdi eken. Bizde de osyǵan uqsas taǵam túri bar. Qazaqstan týraly kóp bile bermeımin. Sizderdiń arqalaryńyzda aqparat alyp jatyrmyn», — deıdi ıamaıkalyq ata-ana Amanda Raıt.
Káýsar jáne Almasbek Qaraman halyqaralyq jýrnalısterdiń balalary. Londonda ýaqytsha turyp jatyr. Mektebindegi jalǵyz qazaq ultynyń ókilderi. Londondaǵy sheteldikterge týǵan jerin nasıhattap júr. Hıý Mıddlton atyndaǵy mektepte olardan bólek ondaǵan ult ókili oqıdy. Barlyǵy tańerteńnen ulttyq kıimderin kıip kelip, synyptastaryna tarıhı otany týraly aqparat berdi.
«Biz Palestınanyń ókilderimiz. Elimizdiń mádenı muralaryn kórsetkimiz keldi. Mynaý Taıaý Shyǵystan ákelingen qurma jemisi. Ulttyq sýsynymyz qara sháımen ishsin dep alyp keldik", — deıdi palestınalyq ata-ana Fadı Alraıs.
Italııalyq ata-ana Marıo Petrýnı búgin balalarǵa Italııanyń ulttyq taǵamy pıtstsa pisirip úıretkenin aıtty. Onyń aıtýynsha, qazaqtar sııaqty olar da unnan jasalatyn taǵam túrleri kóp.
Ulybrıtanııa — kóp ultty memleket. Aǵylshyn, shotland, ırland jáne ýels halqynan bólek burynǵy otar memleketterinen qonys aýdarǵan ulttardyń urpaqtary da turady. Jergilikti úkimet olardyń tili, dini jáne dástúrleriniń saqtalýyna erekshe mán beredi.