Londonda Ýımbldon týrnıri bastalady: qazaqstandyqtardyń múmkindigi qandaı
Kógal tósenishinde ótetin aıtýly dodada Qazaqstannyń basty úmiti Elena Rybakına ekendigi daýsyz.
2022 jyly fınalda týnıstik Ons Jaberdi 3:6, 6:2, 6:2 esebimen utyp, qazaqstandyqtar arasynda alǵash ret Ýımbldonda top jarǵan E.Rybakınaǵa jankúıerler bıyl da senim artady. Ótken jyly shırek fınalda dál sol O.Jaberge 7:6 (7:5), 4:6, 1:6 esebimen jol bergen qazaqstandyq tennısshi bıyl da jeńiske jetýge tyrysatyny sózsiz.
Mamandardyń topshylaýynsha, Rybakına bastapqy matchynda reıtıngide 152-orynda turǵan rýmynııalyq Elena-Gabrıela Rýseni eki sette utýy, odan keıin jolyǵa qalsa, germanııalyq Laýra Zıgemýnd, kanadalyq Leıla Fernandesten ótýi múmkin. Tórtinshi aınalymda kógal tósenishinde jaqsy oınaıtyn reseılik Anna Kalınskaıa Rybakınaǵa tosqaýyl qoıýy yqtımal.
Dopty qatty beretin Elenaǵa kógal tósenishi qolaıly. Alaıda sońǵy kezderi jaraqatyna jáne densaýlyǵyna baılanysty birneshe jarystan shet qalǵan Rybakına jankúıerlerin ábden alańdatyp qoıdy. Endi qazaqstandyq sportshy qalpyna tolyq kele aldy ma, ony aldaǵy oıyndar kórsetedi.
Ýımbldon favorıtteri qatarynda álemniń 1-raketkasy, Polsha ókili Iga Shventek, 3-satydaǵy belorýssııalyq Arına Sobolenkolarmen birge E.Rybakınanyń esimi atalǵanymen, bárin aıtýly dodadaǵy jekpe-jekter sheshedi. Tipti oıda-joqta buryn artta júrgen tennısshilerdiń jarq etip shyǵa kelýi ábden múmkin. Buǵan mysal retinde ıtalııalyq ıAsmıne Paolınıdiń Rolan Garrosta fınalǵa deıin jetýin aıtýǵa bolady. Eń bastysy, oıynshy babynda jáne jaraqattan ada bolsa, kózdegen mejege qol jetkize alady. Ýımbldon qarsańynda chempıondyqtan basty úmitkerlerdiń biri A.Sobolenkonyń sońǵy kezde jaraqatyna baılanysty qınalyp júrgenin aıtýy da biraz syrdy ańǵartady.
Qazaqstanǵa qaıta oralsaq, osyǵan deıin sporttyq jolynda alǵash ret kógal tósenishinde ótken Bırmıngem (Ulybrıtanııa) WTA 250 týrnırinde úzdik shyqqan ıÝlııa Pýtıntseva ótken jyly Ýımbldonda alǵashqy aınalymnan asa almaǵan edi. Bıyl kezinde dúnıejúzilik reıtıngide kósh bastaǵan «Úlken dýlyǵa» týrnıriniń úsh márte chempıony, germanııalyq, 36 jastaǵy Anjelıka Kerberdi jeńse, ótken jylǵy kórsetkishin jaqsartady.
Qazaqstannyń erler arasyndaǵy birinshi, álemniń 23-raketkasy Aleksandr Býblık ótken jyly Ýımbldonda tórtinshi aınalymǵa deıin jetip, onda bes settik, asa tartysty matchta reseılik Andreı Rýblevqa jol berdi. Bıyl birshama tabysty óner kórsetip, reıtıngide úzdik kórsetkishine (17-oryn) qol jetkizgen Býblıkke ótken jylǵy upaılaryn qorǵaý ońaıǵa túspeıdi. Alǵashqy eki aınalymnan sátti ótken kúnniń ózinde sodan keıin álemniń 12-raketkasy, amerıkalyq Tommı Polǵa tap bolýy ábden yqtımal. Al reıtıngide 58-oryndaǵy Aleksandr Shevchenko bastapqy kezdesýinde-aq álemniń 16-raketkasy, frantsııalyq Ýgo Ýmbermen sheberlik talastyrady.
Juptyq synda Anna Danılına men Aleksandr Nedovesov ótken jyly Ýımbldonda bastapqy aınalymda-aq toqtaǵan bolatyn. Bıyl sol kórsetkishterin jaqsarta alsa, tabys taýyp, reıtıngilik upaı jınaýǵa múmkindik berer edi.
Eske sala keteıik, budan buryn Rybakına men Pýtıntsevanyń qarsylastary anyqtalǵanyn jazǵan bolatynbyz.