Londonda Palestınany qoldaıtyn belsendiler qor bırjasyn buǵattamaq bolǵan

<p>Polıtsııa London qor bırjasynyń jumysyna kedergi keltirmek bolǵan alty palestınalyq belsendini ustady, dep habarlaıdy Kazinform tilshisi.</p>

Daily Express gazetiniń jazýynsha, polıtsııa belsendilerdiń Izraıldiń Gaza sektoryndaǵy áreketterine narazylyq retinde saýdanyń bastalýyna jol bermeý úshin qańtardyń 15-i kúni tańerteń London qor bırjasy ǵımaratynyń kireberisin jaýyp tastaýǵa daıyndalyp jatqanyn habarlaǵannan keıin tergeýdi bastady.

- 14 qańtar, jeksenbi kúni tańerteń Mersısaıd polıtsııasynyń áriptesterimen birlesip jumys isteıtin polıtsııa qyzmetkerleri Lıverpýlde qylmystyq zııan keltirý nıeti bar degen kúdikpen 31 jastaǵy er adamdy ustady, - dep habarlady London polıtsııasy.

Polıtsııa sybaılas dep tanyǵan taǵy bes adam jeksenbi kúni London, Lıverpýl jáne Braıtonnan ustaldy. Altaýy da qamaýda.

Polıtsııa málimdemesinde ustalǵandardyń London qor bırjasyn buǵattaý úshin josparlaǵan áreketiniń sońy «aýyr jazaǵa ákelýi múmkin» dep kórsetilgen.