Halyqaralyq daýlar aptalyǵyna «Astana» HQO soty men Halyqaralyq tórelik ortalyǵy qatysty
Halyqaralyq daýlar aptalyǵy bıyl 100-den astam ıýrısdıktsııanyń basyn biriktirdi. Mańyzdy is-sharaǵa qatysý úshin Londonǵa álemniń túkpir-túkpirinen 7000-nan astam zań sarapshysy keldi. Sala mamandary 150-deı sharaǵa qatysyp, kúrmeýli máseleler boıynsha pikir talastyrdy, áriptestik ornatyp, tájirıbe almasty.
«Búgingi óte mańyzdy is-sharaǵa Latyn Amerıkasy, Azııa, Afrıka jáne álbette Qazaqstannan kelgen zańgerler qatysyp jatyr. Ilegenimiz bir teriniń pushpaǵy – biz halyqaralyq daýlardy sheshemiz, cot tóreligine qol jetkizýdi qamtamasyz etemiz. Búgingi platforma pikir almasyp, oı bólisýge arnalyp otyr», - deıdi Londondaǵy Halyqaralyq daýlar aptalyǵynyń uıymdastyrýshysy Artem Dýdko.
«Qazaqstan bıligi «Astana» halyqaralyq qarjy ortalyǵyn damytýda zor jetistikterge jetti. Biz ortalyq sotynyń basshysy Lord Meldon Bernettpen pikir almasqanymyzǵa qýanyshtymyz. Óıtkeni ol kisiden úırenerimiz kóp. Ortalyqtyń TMD memleketterine ǵana emes halyqaralyq deńgeıdegi bıznes qaýymdastyqqa da biraz kómegi tıip jatyr», - deıdi McNair International zań kompanııasynyń ókili Havar Kýreshı.
«Astana» halyqaralyq qarjy ortalyǵynyń soty men Halyqaralyq tórelik ortalyǵy 6 jyldan astam ýaqyttan beri jumys istep keledi. Olar osy aralyqta 2 600-den astam daýly is qarap, 28 eldiń ınvestorynyń suranysyn 100 paıyz qanaǵattandyrdy. Kompanııalardyń basym kópshiligi Eýrazııa memleketterinen. Aralarynda Qytaı, Birikken Arab Ámirlikteri, Úndistan sııaqty elimizdiń basty saýda seriktesteri de bar.
«Qazaqstan men Eýrazııa elderiniń ıgiligi úshin jasap jatqan jumysymyz týraly aıtyp berdik. Halyqaralyq deńgeıde joǵary standarttarǵa jaýap beretin uıymǵa aınalyp jatqanymyzdy qýana habarladyq. Osyny túsingen ınvestorlar Qazaqstanmen jumys isteýge qulshynys tanytyp jatyr. Olar táýelsiz sot tóreligine senim artady», - deıdi AHQO sotynyń tirkeýshisi jáne apparat basshysy Krıstofer Kempbell-Holt.
«Qarjy ortalyǵynyń sotynda 3 is boıynsha tyńdalymǵa qatystym. Onyń ishinde Qazaqstandaǵy mınıstrlikterge de qarsy ister boldy. Sheteldik ınvestorlardyń múddelerin sátti qorǵap shyqtyq. Eger buryn kompanııalar London, Parıj, Sıngapýrdaǵy arbıtrajdarda ádildik izdese, qazir Astanadaǵy qarjy ortalyǵynyń sotynda otyryp-aq múddelerin qorǵaı alady», - deıdi Halyqaralyq «Grata» zań fırmasynyń basqarýshy seriktesi Gúlnur Nurkeeva.
Daýlardy sheshý aptalyǵynyń bıylǵy taqyryby: «Jahandyq syn-qaterler men múmkindikter úshin birigý». Bul byltyrǵy «Ózgermeli álemge beıimdelý» taqyrybynyń jalǵasy ispettes. Qatysýshylar ótken jyly daýlardy sheshý áleminde qandaı jetistikterge qol jetkizgenin, sondaı-aq kelesi jyldan ne kútetinin ortaǵa saldy.