Londonda Qazaqstannyń týrıstik áleýeti tanystyryldy

LONDON. QazAqparat - Ulybrıtanııa astanasynda Qazaqstannyń týrıstik áleýeti tanystyryldy. Álemniń túkpir-túkpirinen jınalǵan qaýymǵa Uly dala eline saıahattaýdyń artyqshylyqtary týraly aıtyldy. Otandyq týroperatorlar sheteldik áriptesterin iskerlik qarym-qatynas ornatýǵa shaqyrdy, dep habarlaıdy QazAqparat tilshisi.

Turalap qalǵan týrızm salasy pandemııadan keıin qaıta qarqyn ala bastady. Shekteýler jeńildegeli saıahatqa degen qyzyǵýshylyq artty.

Halyqaralyq týrızm kórmesi sol suranysty qanaǵattandyrý úshin dúnıejúzi boıynsha 180 elden 5000-nan astam qatysýshy jáne 150 myńǵa jýyq kórermen jınady.

«Kórme, roýd-shoý sııaqty sharalardan keıin elimizge 200-500 týrıstke deıin keledi. Biraq odan bólek ımıdjimiz artady. Qazaqstan mundaı sharalarǵa qatyspasa, basqa memleketter biz týraly bilmeıdi. Ekinshiden, týrızm saýda jáne ınvestıtsııanyń damýyna ásere etedi. Óıtkeni ol uǵymdar qatar júredi», deıdi «Kazakh Tourism» UQ» AQ basqarma tóraǵasy Talǵat Amanbaev.

Kóptegen elder úshin týrızm - ındýstrııa. Ol kiris ákelip, halyqtyń ál-aýqatynyń jaqsarýyna kómektesedi.

Qazaqstanda da týrızm ilgeri damyp kele jatqan salalardyń biri jáne onyń álemdik naryqta oıyp turyp oryn alýǵa múmkindigi jetkilikti.

«Qazaqstanda týrızm turǵysynan sheteldik qonaqtarǵa kórsetetin kóp dúnıe bar ekendigine senimdimin. Buǵan qosa bul sala bizdiń ekonomıkamyz úshin óte qajet ındýstrııaǵa aınala alady. Sondyqtan meniń oıymsha, Qazaqstannyń osyndaı halyqaralyq kórmelerge belsendi qatysýy óte mańyzdy», deıdi Qazaqstannyń Ulybrıtanııadaǵy elshisi Maǵjan Іlııasov.

Basqalardy bylaı qoıǵanda brıtanııalyq saıahatshylardyń elimizge degen qyzyǵýshylyǵy joǵary.

Olar Uly Jibek Joly boıynda ornalasqan kóne qalalarymyz ben tylsym tabıǵatymyzǵa yntyzar. Onyń ústine aǵylshyndardan 30 kúnge deıin vıza talap etilmeıdi.

Pandemııaǵa deıin 2019 jyly 23 myńǵa jýyq brıtanııalyq Qazaqstanǵa atbasyn burǵan eken.

«Bıyl koronavırýstan keıin birinshi bolyp, Ulybrıtanııadan týrıster keldi. Olar, men oılaımyn, eshteńeden qoryqpaıdy. 12-17 kúnge kelip toqtady. Aǵylshyndar elimiz týraly aldyn ala oqyp, daıyndalyp keledi. Biz olarǵa ártúrli qyzyqtarymyzdy usynamyz. Shatqaldar, saıabaqtar, Jibek joly marshrýttaryn kórsetemiz», deıdi «Turan-Azııa» týrıstik kompanııasynyń dırektory Gúlǵaısha Qasenova.

«Ókilderińizben otyryp áńgimelestim. Ekranda kórsetilip jatqan vıdeony kórip, tań-tamasha boldym. Menińshe, sizderde dástúr, mádenıet, sáýlet óneri jáne tabıǵat keremet úılesim tapqan. Men Qazaqstanda eshqashan bolmadym, biraq 2023 jyly barýdy josparlap otyrmyn», deıdi saıahatshy Tom Peıdj.

Eýropalyq týrıst Qazaqstanǵa taban tiregende ortasha alǵanda qaltasynan 1 500 dollar shyǵarady eken.

Máselen, 100 týrıst kelse, osyndaı is-sharalarǵa jumsalǵan shyǵyn salyqtyń esebinen tolyq jabylyp, jergilikti bıýdjettiń de, bıznestiń de kirisi eselene túsedi deıdi mamandar.