Londonda qazaqsha sóıleý klýby ashyldy
Klýbtyń tusaýkeser rásimine Kazinform-nyń Tumandy Albıondaǵy tilshimiz Ǵalymjan Qaramanuly qatysyp qaıtty.
Stıv Skrıýtın - qarjy salasynyń mamany. Aǵylshyn jáne orys tilderinde erkin sóıleıdi. Endi mine qazaq tilin meńgergisi bar. Sharýalaryn ysyryp qoıyp, búgin osynda keldi. Sóıleý jáne tildi túsiný daǵdylaryn jetildirý úshin kóp eńbektený kerektigin Stıv moıyndaıdy.
«Men endi bastap jatyrmyn. Ózimmen deńgeıles til úırenýshilerdi taptym. Bul tildi tez meńgerýime kóp kómegin tıgizedi dep oılaımyn. Óıtkeni sózdik qoryń jáne tildik bazań olarmen birdeı bolady», - deıdi Stıv Skrıýtın.
Sheteldikterdiń qazaq tilin úırenýdegi maqsaty ár-alýan. Biri Qazaqstanǵa týrıstik saparmen barǵysy keledi. Endi biriniń jubaıy qazaq ultynan. Qazaqtildi adamǵa ǵashyq bolyp qalǵandar da kezdesedi. Taǵy biriniń qazaq avtorlarynyń shyǵarmalaryn túpnusqada oqyp, túsingisi bar.
«Aǵylshyn tiliniń muǵalimi bolǵan soń basqa tilderdi de meńgergim keledi. Qazaq tiliniń dybystalýy óte unaıdy. Ótken jyly ózdigimmen úırenýge tyrystym. Biraq olaı qyzyq emes eken. Dybystalýyn este saqtaý qıyn jáne eshkimmen sóılese almaısyń», - deıdi aǵylshyn tiliniń muǵalimi Sebastıan Dann.
Qazaqsha sóıleý klýbyna tek sheteldikter ǵana emes otandastarymyz da múshe. Olar ana tilin tolyq meńgermegenderin ar sanap, osynda kelgen. Sondaı-aq basqa memlekette týǵan qandastarymyz da til bilimderin jetildirip jatyr.
«Qazaqpyn ǵoı. Úıde de áke-sheshem qazaqsha ǵana sóıletkizedi. Sondyqtan qazaqshany bilý óte mańyzdy dep oılaımyn. Ózim Qytaıdan keldim. Qytaıda qytaısha sóıleımin. Biraq úıde basqa til qoldanbaımyz. Ana tilimdi óte jaqsy kóremin», - deıdi stýdent Qymbat Mádenıetqyzy.
Klýb músheleri deńgeılerine qaraı shaǵyn toptarǵa bólinip, birneshe ústel basyna otyrdy. Túrli taqyryptarda talqylaýlarǵa qatysyp, senimdilikterin arttyrdy. Sharanyń uıymdastyrýshylary Ulybrıtanııadaǵy qazaq ortalyǵy jáne eriktiler toby. Olar ǵımarat jaldaý shyǵyndaryn, oqý-ádistemelik quraldaryn daıyndaý jumystaryn óz moınyna alǵan.
«Meniń Anglııada turyp jatqanyma 24 jyl boldy. Joldasym aǵylshyn ultynan. Balalarym eresek, ósip ketti, qazaqshany durys bilmeıdi. Joldasym úırenip júr. Endi olarǵa úırenetin orta kerek. Qazaqstanmen baılanysymyzdy, mádenıetimizdi joǵaltpaýǵa, elimizben tyǵyz baılanysta bolý úshin osyndaı qadamǵa baryp otyrmyz», - deıdi qazaqsha sóıleý klýbynyń uıymdastyrýshysy Álııa Qanatbekqyzy.
Qazaqsha sóılesý klýbynyń tusaýkeser rásiminde jastar myń burala bı bıledi, dombyramen quıqyljytyp, kúı oryndady. Uly Abaıdyń óleńderin qazaq jáne aǵylshyn tilderinde oqydy. Klýbqa qatysý tegin. Bastapqyda aıyna bir ret bas qosý josparlanyp otyr. Kókke shyǵyp, taza aýada til úırený de oıda bar. Suranys artsa, kezdesýler jıirek ótkizilmek.