Londonda «Astana» HQO artyqshylyqtary aıtyldy

ASTANA. QazAqparat - Londonda zańgerler men konsaltıng kompanııalarynyń ókilderine «Astana» halyqaralyq qarjy ortalyǵy týraly aqparat berildi.

Túsindirý jumystaryn qarjy ortalyǵynyń artyqshylyqtarymen etene tanys brıtanııalyq áriptesteri júrgizdi, dep habarlaıdy QazAqparat tilshisi.

Búgingi tańda 53 brıtanııalyq kompanııa «Astana» halyqaralyq qarjy ortalyǵynda tirkelgen. Olar konsaltıng, zań, IT jáne basqarý qyzmetterin usynýmen aınalysady.

Sarapshylardyń pikirinshe, halyqaralyq ınvestorlar sońǵy eki jyl kóleminde álemde jáne bizdiń elde bolǵan oqıǵalardan keıin eki oıly bolyp qalǵan. Ýkraınadaǵy qaqtyǵystar men Qazaqstandaǵy Qańtar oqıǵasy olardyń senimine selkeý túsirgendeı. Al bıznes qaýymdastyqtyń betin beri qaratý úshin olardy tolyqqandy aqparatpen udaıy qamtamasyz etip otyrý kerek. «Astana» - aǵylshyn quqyǵy qaǵıdattaryna súıene otyryp, erekshe quqyqtyq rejımde jumys isteıtin, bıznes ıelerine jeńildikter usynatyn halyqaralyq qarjy ortalyǵy. Bul artyqshylyqtar ınvesttsııalardyń Qazaqstanǵa aǵylýyna jol ashady dep oılaımyn. Qarjy ortalyǵy ınvestorlardyń senimdi bolýyna tolyq kepildik bere alady. Sol týraly aıtýǵa keldik», - deıdi «Astana» HQO Quqyqtyq konsýltatıvtik keńesiniń múshesi Endrıý Oldlend.

Kezdesýge qatysýshylar brıtanııalyq bıznes ıelerine zań jáne esep-qısap qyzmetin kórsetetin kompanııalardyń ókilderi. Qarjy ortalyǵynyń artyqshylyqtary týraly olar bilse, klıentteri de habardar bolady.

Mundaı basqosýlar nysanaly aýdıtorııany tartýdyń tıimdi túri, deıdi uıymdastyrýshylar.

Jınalǵandardy Reseıge salynǵan sanktsııalardyń Qazaqstanǵa áseri taqyryby asa qyzyqtyrdy. Halyqarlyq arbıtrajdyq ortalyqtyń jáne sottardyń daýlardy sheshý máselesi de olardyń nazarynan tys qalmady.

«Astana» qarjy ortalyǵynyń normatıvtik-quqyqtyq ortasynyń jetilgendigine jáne halyqaralyq deńgeıdegi suranystarǵa jaýap beretinine kózimiz jetti. Qarjy ortalyǵy aǵylshyn quqyǵyna negizdelgendikten kelisim-shartqa otyrǵan taraptar sot aldyndaǵy daýlaryn sheshe alatyndyǵyna senimimiz artty», - deıdi brıtanııalyq advokat Djamshıd Pırý.

Qarjy ortalyǵy týraly brıtanııalyq iri saýda jáne ınvestıtsııa kompanııalary, London qor bırjasyndaǵylar jaqsy biledi. Biraq tizimniń tómengi jaǵynda turǵandar beıhabar bolýy múmkin. Endigi maqsat jergilikti bıznes qaýymdastyqty túgel qamtyp, ortalyq jumysyn odan ári jetildirý. Al bul - ýaqytty qajet etedi. Dýbaıdaǵy halyqaralyq qarjy ortalyǵyna óz-ózin dáleldeýi úshin shamamen 15-20 jyl ketipti. Biraq «Astana» qarjy ortalyǵyna 7-10 jyl da jetkilikti bolady deıdi mamandar.