Londonda árbir besinshi bala qarajat tapshylyǵynan nárli tamaq ishe almaıdy

LONDON. QazAqparat - Londonda ár besinshi bala otbasyndaǵy qarajat tapshylyǵynan ashtyq sezimin bastan ótkeredi, dep habarlaıdy QazAqparat menshikti tilshisi Metro gazetine silteme jasap.

Childhood Trust qaıyrymdylyq uıymynyń málimetinshe, Ulybrıtanııa astanasynda jarty mıllıonǵa jýyq bala azyq-túlik baǵasynyń ósýine baılanysty durys tamaqtanbaý qaýpine ushyraıdy.

Jasóspirimderdiń 40% qalypty ósý men damý úshin turaqty jáne nárli taǵamǵa qoljetimdiliktiń bolmaýynan zardap shegetini atap ótildi.

Mundaı tańqalarlyq tujyrym 7-16 jas aralyǵyndaǵy 280 baladan alynǵan saýalnama negizinde jasaldy.

Eger bul derekterdi London halqyna ekstrapolıatsııalasaq, 426 myńnan astam bala paıdaly taǵamnyń jetispeýshiligin sezinedi dep boljaýǵa bolady.

Brıtan parlamentiniń depýtaty Reıchel Rıvz ınflıatsııanyń kúsheıýine baılanysty brıtandyqtar azyq-túlik satyp alý men úı jylytý arasynda tańdaý jasaýǵa májbúr ekenin aıtty.

Sonymen qatar, Salvation Army qaıyrymdylyq uıymy júrgizgen jeke saýalnama brıtan eresekteriniń úshten ekisi merekelik rojdestvolyq keshki asqa qol jetkize alatynyna senimdi emes ekenin kórsetedi.

Olardyń kópshiligi muqtajdarǵa tegin azyq-túlik taratatyn azyq-túlik bankterin paıdalanýdy josparlap otyr.

Esterińizge sala keteıik, Ulybrıtanııadaǵy azyq-túlik baǵasy sońǵy 45 jyldaǵy eń jyldam qarqynmen ósip jatyr. Ómir súrý qunynyń kúrt ósýi tabysynyń jartysyna jýyǵyn azyq-túlik pen energııaǵa jumsaıtyn kedeı brıtandyqtarǵa qatty áser etti.

Foto: Alamy