Londonda Abaı-Berns qaýymdastyǵy quryldy
Qonaqtardy shotlandtardyń ulttyq mýzykalyq aspaby volynkada halyq áni «Qamajaıdy» oryndaǵan jartylaı aǵylshyn, jartylaı shotland Mettıý Makreı kútip aldy. Ádette volynkany Shotlandııamen baılanystyrady. Biraq anyǵynda oǵan uqsas aspap qazaq halqynda da bar - jelbýaz dep atalady. Sondyqtan da bolar, halyq ánin oryndaý ónerpazǵa qıynǵa soqpady.
Robert Berns - shotland aqyny, folklorshy, kóptegen poemalar men óleńderdiń avtory. Onyń poezııasyna ıronııa, sarkazm jáne lırızm tán.
Óleńderin Qýandyq Shańǵytbaev jáne Ótejan Nurǵalıev syndy birneshe qazaq aqyny tárjimalaǵan. Berns Abaı Qunanbaıulynan jarty ǵasyr buryn dúnıege kelgen, biraq shyǵarmashylyqtaryna tán ortaq taqyryptar kóp.
«Abaı men Bernstiń poezııasy óte uqsas. Osy sharaǵa keler aldynda men Abaıdyń shyǵarmalarymen tanystym. Ekeýi de óte sezimtal aqyndar. Mahabbat, sulýlyq, tabıǵat týraly jazǵan óleńderine tántimin. Uly tulǵalardyń árýaǵy qaýymdastyqtyń qurylǵanyna qýanyp, bir aýnap jatqan shyǵar», - deıdi Abaı-Berns qaýymdastyǵynyń múshesi Ýılıam Peıtı.
Qaýymdastyqtyń tusaýkeseri poezııa keshine ulasyp, uly tulǵalardyń shyǵarmalary qazaq jáne aǵylshyn tilderinde oqyldy. Dımash Qudaıbergenniń jankúıerleri súıikti ánshisiniń repertýaryndaǵy «Kózimniń qarasy», «Jelsiz túnde jaryq aı» óleńderiniń mazmunyn sheber jetkize bildi.
«Abaıdyń óleńderi óte áýezdi keledi. San-alýan emotsııalarǵa bóleıdi. Oqyǵan kezde án tyńdap otyrǵandaı áserde bolasyń. Osydan keıin qazaq poezııasyn oqı bergiń keledi, elge saıahattaýǵa yntalandyrady», - deıdi qaýymdastyq múshesi Sebastıan Dann.
Abaı-Berns qaýymdastyǵynyń basty maqsaty eki el arasyndaǵy mádenı jáne rýhanı baılanystardy nyǵaıtyp, jan-jaqty damýyna atsalysý, uly aqyndardyń shyǵarmashylyǵyn ulyqtaý. Uıymǵa ázirge 50-den astam dıplomatııa, bilim jáne bıznes ókilderi múshe. Bolashaqta olardyń sanyn arttyrý josparlanyp otyr.
«Men Qazaqstanmen sońǵy 7 jyldan beri iskerlik baılanys ornatyp kelemin. Mádenıeti ǵajap, óıtkeni halqy ǵajap! Sol týraly kórgen-bilgenimdi Ulybrıtanııa halqyna jetkizgim keledi. Tumandy Albıon da mádenıetke baı. Shotlandııanyń baǵa jetpes qundy dúnıeleri de erekshe. Mádenı almasýdy nyǵaıtý - basty mindetimiz», -deıdi Abaı-Berns qaýymdastyǵynyń negizin qalaýshy Afzal Amın.
Qaýymdastyqqa Qazaqstanmen bıznes jasaıtyn ortanyń ókilderi demeýshilik etedi. Uıymdastyrýshylar jylyna keminde eki basqosý ótkizýdi josparlap otyr - Astanada jáne Londonda. Sonymen qatar sharalarǵa shaǵyn qalalardy da tartý mejelenip otyr.