LONDON OLIMPIADASY: Úshtikten kóriný arman, al ondyqqa ený mártebe

ASTANA. 20 mamyr. QazAqparat - Bıylǵy jyldyń basty oqıǵasy Ulybrıtanııa astanasy Londonda ótetin HHH jazǵy olımpıadasy oıyndarynyń bastalýyna 67 kún qaldy. «QazAqparat» agenttigi dástúrli túrde aptanyń ár jeksenbisinde osy aıtýly sporttyq sharada Qazaqstannyń namysyn qorǵaıtyn sportshylardy tanystyrýdy jalǵastyrady.

Osy joly biz oqyrman nazaryna dúbirli dodada Qazaq eliniń namysyn sınhrondy júzýden qorǵaıtyn sportshylarymyz jaıyndaǵy aqparatty usynbaqpyz.

Este bolsa, aǵymdaǵy jyly elimizdiń atyn álemdik deńgeılerdegi jarystarda pash etip júrgen sınhronshylar Anna Kýlkına men Áıgerim Jeksembınova London Olımpıadasynyń joldamalaryn utyp alǵan edi. Olar Londonda ótken biliktilik týrnırinde tehnıkalyq jáne erikti baǵdarlamalardyń qorytyndysy boıynsha 14-inshi orynǵa ıe boldy. Anna men Áıgerimniń atalǵan jetistikteri olarǵa álemniń úzdik 24 jubymen birge London Olımpıadasyna qatysýǵa múmkindik bergen edi.

Sportshylarymyzdy tanystyrmas buryn osy sport túriniń tarıhyna sholý jasasaq. Bir qyzyǵy, bul sport túriniń shyǵý tarıhyna qatysty derekter ala-qula. Bir jerde onyń túptórkinin kári qurlyqqa telise, kelesi materıalda Kanadadan bastaý alǵan degen aqparat bar. Sonymen sınhrondy júzý áýen yrǵaǵymen túrli fıgýralardyń sýda oryndalýymen baılanysty sport túri. Bir qaraǵanda óte ońaı sport túri kóringenimen shyn máninde kóp kúsh-qýatty, tózimdilik pen shydamdylyqty, asqan sheberlikti qajet etedi. Bastapqyda sý baleti retinde tanymal bolǵan sınhrondy júzý 1920 jyldary Kanadada paıda bolyp, araǵa 10 jyl salyp búkil AQSh-qa taraǵan. 1948 jyly-aq bul sport túri olımpıada oıyndarynda kórsetilim túrinde qosylyp, 20 jyl boıy sol kúıinde qalyp qoıdy. Tek 1984 jyly Los- Andjeleste ótken oıyndarda ǵana olımpıadalyq sport túri retinde tolyqqandy quqyqtyq mártebege ıe bolyp, jeke jáne juptyq jarystar ótkizildi.

1992 jylǵy Barseleno olımpıada oıyndaryna deıin sınhrondy júzý jarysynyń baǵdarlamasy jeke jáne juptyq razrıadtan turdy. Al araǵa tórt jyl salyp Atlantada ótken oıyndardyń olımpıadalyq baǵdarlamasynda sınhrondy júzý jarysyna ózgerister engizilip, jeke jáne juptyq razrıadtar alynyp tastalyp, toptyq jattyǵýlar qosyldy. Osylaısha sol joly bul sport túrinen bir ǵana nagrada jıyntyǵyna talas boldy. Al 2000  jylǵy olımpıada oıyndarynan bastap nagradanyń eki jıyntyǵy, atap aıtqanda juptyq jáne komandalyq jarystardyń jeńimpazdaryna medal  berile bastady.

Mine osyndaı tarıhy bar sport túrinen joǵaryda atap ótkenimizdeı eki sportshymyz Qazaq eliniń namysyn qorǵaıtyn bolady.

Onyń birinshisi - Áıgerim Jeksenbınova. 1993 jyly dúnıege kelgen bul sportshymyz halyqaralyq sanattaǵy sport sheberi. Ol eń úzdik nátıjeni osydan eki jyl buryn ótken Azııa oıyndarynda kórsetip, aralas baǵdarlamada úshinshi orynǵa turaqtaǵan bolatyn. Al 2011 jyly  dál osy baǵdarlama boıynsha álem chempıonatynda onynshy orynǵa turaqtaǵan edi. Biz óz tarapymyzdan sınhrondy júzýden Qazaqstan ulttyq quramasynyń bas jattyqtyrýshysy Janna Genchenkoǵa habarlasyp, London olımpıadasynyń joldamasyn ıelenip otyrǵan sportshylar jaıyndaǵy pikirin bilip edik. «Óte eńbekqor ári tártipke boısunatyn sportshy. Júzýmen alty jasynan aınalysatyn Áıgerim árqashanda da tyńǵylyqty jattyǵýǵa den qoıady. Bul onyń alǵashqy olımpıadasy. Jasyratyny joq, biz odan joǵary nátıjeler kútemiz. Jalpy, ol týraly aıtar bolsam, ómirde óte sypaıy bolýymen qatar óz isine tyńǵylyqty dep baǵa berer edim», - deıdi ol.

Áıgerimniń juptasy Anna Kýlkına 1986 jyly dúnıege kelgen. Almaty qalasynyń atynan óner kórsetetin ol halyqaralyq sanattaǵy sport sheberi. Onyń úzdik nátıjesi - 2009 jyly Italııada ótken Álem cheıpıonatynda jeke baǵdarlamada onynshy orynǵa taban tireýi. Ol 2006  jyly Arna Toqtaǵanmen juptasyp, Azııa oıyndarynda qola júldeni qanjyǵasyna baılaǵan-dy. Sonymen qatar 6 jasynan júzýmen aınaldysatyn  bul sportshymyz 2010  jyly Azııa oıyndarynda aralas baǵdarlamany oryndaýda qola medaldi mise tutqan edi.

«Ol bizdiń úzdik ári eńbekqor sportshylarymyzdyń biri. Tyńǵylyqtyǵymen qatar jattyqtyrýshynyń kez kelgen nusqaýyn bar ynta-jigerimen oryndaýymen erekshelenedi. Beıjińde ótken olımpıada oıyndarynda ol arqasynyń aýyrýyna baılanysty óziniń sheberligin barynsha ashyp kórsete almaǵan edi. Al osy joly óz ónerin 100 paıyz kórsete alady dep senim artyp otyrmyz», - deıdi Janna Genchenko.

Jalpy bas jattyqtyrýshynyń aıtýyna qaraǵanda, London olımpıdasynda Qazaq eli úmit artyp otyrǵan bul sportshylardyń juptasyp óner kórsetkenderine kóp bola qoıǵan joq. Anna Kýlkına buǵan deıin Arna Toqtaǵanmen jupta óner kórsetken edi. Al ol Beıjiń olımpıadasynan keıin úlken sportpen qosh aıtysqan bolatyn. Sınhrondy júzýden eldiń ulttyq quramasynyń tizginin ustaǵan mamandar sportshylar aldyna keminde 15-shi orynǵa turaqtaýdy mindettep otyr. Degenmen odan da joǵary nátıje kútetindigin jasyrmaıdy da. Demek, úshtikten kóriný arman, al álemniń úzdik on sportshysy qatarynan kóriný qazaq sportshylary úshin zor mártebe bolar edi.