Lokdaýnǵa jol bermeýimiz kerek – Bekshın

ALMATY. QazAqparat - Almaty qalasynyń bas sanıtarlyq dárigeri Jandarbek Bekshın onlaın brıfıng barysynda qala turǵyndarynyń karantın talaptaryn saqtamaıtynyn aıtty, dep habarlaıdy QazAqparat tilshisi.

Onyń aıtýynsha, qalada eresekter men balalar kóshede jáne skverlerde beıqam júredi. Eshqandaı saqtyq sharalaryn saqtamaıdy. Bul koronavırýs ınfektsııasynyń jańa tolqynyn týdyrýy múmkin.

Brıfıng barysynda Jandarbek Bekshın jýrnalısterdiń suraqtaryna jaýap bere kele qarqyndy epıdemıologııalyq jaǵdaıǵa qaramastan, jańa shtamdardyń aınalymyna baılanysty lokdaýndy engizý josparlanbaǵanyn málim etti.

«Barlyǵy bizdiń tártipke, epıdemııaǵa qarsy sharalardy saqtaýǵa baılanysty. Árıne, jańa shtamdardyń anyqtalǵany týraly aqparat alǵanmen, bizdiń medıtsınalyq mekemeler syrqattanýshylyq kúrt ósken jaǵdaıda ǵana daıyndyq júrgizedi», – dedi Jandarbek Bekshın.

«Almatyda koronavırýstyń úshinshi tolqyny kezinde kovıdtik emhanalarda 6 060 tósek-oryn boldy. Qazir aýrýdyń azaıýyna baılanysty olardyń sany 1700-ge deıin tómendedi. Іndetti juqtyrý artqan jaǵdaıda emdeý mekemeleri qaıta baqylaý júrgizedi», - dedi ol.

«Búginde lokdaýnǵa qatysty másele turǵan joq. «Delta» shtamyn juqtyrǵan bir jaǵdaı anyqtaldy. Lokdaýnǵa jol bermeýimiz kerek. Ol úshin barlyq shekteý sharalaryn saqtaý qajet», – dedi Jandarbek Bekshın.

Almatynyń bas sanıtarlyq dárigeri qala turǵyndaryn ekpe alýǵa, sondaı-aq betperde rejımi men qoǵamdyq oryndarda áleýmettik qashyqtyqty saqtaýǵa shaqyrdy.