Lokdaýn kezeńinde EAEO-daǵy saýda kedergileriniń sany artyp ketti - Toqaev

NUR-SULTAN. QazAqparat – Eýrazııalyq ekonomıkalyq odaq aıasyndaǵy saýda kedergilerin joıý qajet. Bul týraly Joǵary eýrazııalyq ekonomıkalyq keńestiń otyrysynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Bizge merzimi jetken problemany – ózara saýdadaǵy kedergini sheshý qajet. Lokdaýn kezeńinde olardyń sany artyp ketti. Ekonomıkalyq belsendilik qalpyna kelgennen keıin de ol ózdiginen joıylyp ketpeıtindigine qaýip te bar. Atalǵan shekteýler saýda-ekonomıkalyq qarym-qatynastyń damýyna zııanyn tıigizedi, odaqtyń ósimi men damý áleýetin shekteıdi», - dedi Qazaqstan Prezıdenti.

Memleket basshysy Qazaqstan jáne odaqqa múshe qalǵan elder naryq qatysýshylarynyń barlyǵy úshin teń múmkindik jasaýdy ári kemsitýshilik jaǵdaılar boldyrmaýdy qoldaıdy.

«Komıssııanyń kedergilermen kúresi toqtaýsyz sıpatqa ıe. Biraq, bul jumysty erekshe tıimdi dep aıta almaısyń. Bul - ulttyq deńgeıde saldardy sheshýmen kúres. Osylaı aıtýǵa bolatyn bolsa, onda barynsha preventıvti odaqtyq pozıtsııany ekonomıkalyq ıntegratsııaǵa jaýapty mınıstrlikter bildirýi tıis dep sanaımyz. Atalǵan kedergiler men shekteýler engiziletin tıisti normatıvtik-quqyqtyq aktilerdi ázirleý kezeńinde qarsylyq bildirip, qorǵaý qajet. Bizge kedergilerdi monıtorıngileýdiń ulttyq júıesin qurý jáne odaqtyń ishki normatıvtik-quqyqtyq aktilerine sáıkestigin oılastyrý qajet. Bul rette de keńes, komıssııa músheleriniń, vıtse-premerlerdiń, Úkimettiń róli úlken», - dedi Qasym-Jomart Toqaev.