Lızıngke tehnıka alatyn sharýalardyń alǵashqy jarnasyn memleket sýbsıdııalamaq

<p>ASTANA. KAZINFORM &ndash; Premer-mınıstr Oljas Bektenov Úkimet otyrysynda aýyl sharýashylyǵy tehnıkasyn lızıngke alý sharttaryn jeńildetý týraly tapsyrma berdi.</p>

«Aýyl sharýashylyǵy tehnıkasynyń tozýy ótkir problema kúıinde qalyp otyr. Qazirgi tańda jalpy tehnıka parkiniń shamamen 75%-dan astamynyń tozyǵy jetken. Bul másele de tıisti sheshimdi talap etedi. Dıqandardyń jańa tehnıkany satyp alýyn jeńildetip, sybaılas jemqorlyq táýekelderin azaıtý qajet.

Atalǵan máseleni sheshý úshin fermerdiń ózi tólep kelgen alǵashqy 15% jarnanyń ornyna tikeleı lızıngtik kompanııaǵa ınvestıtsııalyq sýbsıdııa salynýǵa tıis», - dedi Úkimet basshysy.

Onyń paıymdaýynsha, atalǵan shara sharýalarǵa ózderiniń aınalym qarajatyn saqtap qalýǵa múmkindik bermek.

«Fermerler ózderine tıesili sýbsıdııalardyń tym keshigip tólenetinine narazylyq bildirýde. Ótken jylǵy sýbsıdııalar boıynsha qaryz 160 mlrd teńgeden asyp ketti. Bul qarajatty egis jumystaryna jaratýǵa bolatyn edi. Jeńildikti dızel otynyn úlestirý barysy da erekshe baqylaýda bolýǵa tıis. Alypsatarlyqqa jáne qoldan tapshylyq jasaýǵa jol bermeý kerek», - dedi Oljas Bektenov.

Jalpy, Aýyl sharýashylyǵy mınıstrligi oblys ákimdikterimen birlesip, kóktemgi egis jumystaryn ýaqtyly júrgizý boıynsha barlyq qajetti sharalardy qabyldaýy qajet. 
Jumysty kúsheıtip, anyqtalǵan problemalardy sheshýdiń naqty joldary bolýǵa tıis.