Lıvııadaǵy qul bazary BUU Bas hatshysynyń narazylyǵyn týǵyzdy

ASTANA. QazAqparat - BUU Bas hatshysy Antonıý Gýterrısh Lıvııadaǵy mıgranttardy satý jónindegi habarlamaǵa baılanysty narazylyǵyn bildirdi. 

Ol zańsyz mıgranttardy qul retinde satyp jatqan aýktsıonnyń vıdeosyna súıendi, dep habarlaıdy BUU Jańalyqtar ortalyǵy.

«Bizdiń álemimizde quldyqqa oryn joq. Adam quqyǵyn buzatyn mundaı jan tózgisiz áreketter adamgershilikke qarsy qylmys retinde baǵalanýy múmkin», - dedi BUU Bas hatshysy uıymnyń Nıý-Iorktegi shtab-páterinde jýrnalısterge bergen suhbatynda.

Ol memleketti BUU-nyń  transulttyq uıymdasqan qylmysqa qarsy konventsııalaryn umytpaýǵa jáne onyń barlyq talaptaryn buljytpaı oryndaýǵa, sondaı-aq qazirgi zamanǵy quldyq túrlerimen kúreste birigýge shaqyrdy.

Buǵan deıin amerıkalyq CNN arnasy  Lıvııa bazarynda Eýropaǵa ótýge áreket jasaǵan zańsyz kelimsekterdiń qul retinde satylyp jatqan vıdeosyn jarııalaǵan bolatyn. Olardyń bireýi shamamen 400 dollarǵa aýyl sharýashylyqtarynda jumys istetý maqsatynda satylǵan.