Lıvandaǵy qazaq bitimgeri: Biz eshkimge kúsh kórsetip, qarý qoldanbaımyz
- Asqar Dáýletuly, elden jyraqta qaýipti aımaqta júrsiz. Qıynshylyqqa toly ári jaýapty qyzmetińizdiń qyr-syrymen bólisseńiz.
- Iá, 6 aıdan beri Lıvan memleketinde bitimgershilik qyzmetin atqaryp jatyrmyz. Bitimgershilik rotasynyń eń birinshi maqsaty – beıbitshilikti saqtaý jáne qalpyna keltirý. Bizdiń negizgi qyzmetimizdiń biri - patrýldeý. Patrýldeýdiń eki túri bar. Birinshisi - jaıaý jáne kólikpen sholǵyndaý. Bul kópshilik arasynda belgili bir aımaqta júrgiziledi. Baqylaýymyzǵa alynǵan aımaqtyń tynys-tirshiligin jiti baqylaýǵa alýǵa tyrysamyz. Kúdikti jaıt týyndaǵanda jedel shara qabyldap, joǵary basshylyqqa baıandap otyramyz. Ekinshisi - blokpostarda qyzmet atqarý jáne ózimiz turyp jatqan bazanyń qaýipsizdigin kúzetý. Bul kezde kólikterdiń árli-berli júrisin jiti baqylap, kúdikti jáıt oryn alar bolsa, shuǵyl áreket etýge tyrysamyz.
Qyzmetten qolymyz bosaǵan ýaqytta dene daıyndyǵyna meılinshe mán berip, sport oıyndarymen kóbirek shuǵyldanamyz. Desanttyq shabýyldaýshy áskerılerdiń dene daıyndyǵy óte joǵary deńgeıde bolýy tıis. Sol sebepti qolymyz qalt etkende sport sharalarymen aınalysyp, til úırenýge de den qoıamyz.
Joǵaryda aıtqanymdaı, Lıvandaǵy negizgi mindetimiz, ıaǵnı operatsııamyz - beıbitshilikti saqtaý. Biz eshkimge kúsh kórsetip, qarý qoldanbaımyz. Tek ózimizdi qorǵaý jolyndaǵy sońǵy shara retinde ǵana qarýdy qolymyzǵa alamyz. Bitimgershilik mıssııasynyń eń qıyn ári jaýapkershiligi mol tusy da osy. Sebebi, qandaı qıyn ári kúrdeli jaǵdaı bolsa da, bitimgershiler birinshi bolyp qarý qoldana almaıdy. Sebebi - onyń maqsaty beıbitshilikke shaqyrý jáne saqtaý.
Lıvan elindegi mańyzdy máselelerdiń biri - jergilikti turǵyndarmen bitimgerler arasyndaǵy qarym-qatynasty jaqsartý. Bizge deıin bolǵan bitimgershilik rotalary jergilikti turǵyndarmen jyly baılanys ornatqan eken, biz de sol jolmen júrip kelemiz. Sonyń arqasynda jergilikti turǵyndardyń Qazaq eline degen erekshe kózqarasyn qalypastyryp úlgerdik dep te aıta alamyn. Jergilikti turǵyndar kezdesken sátte qazaqstandyq bitimgerlerge rızashylyǵyn, syı-qurmetin bildirip jatady.
- Halyqaralyq deńgeıdegi qyzmet jaýakershilikti, bilimdi qajet etedi. Jergilikti halyqpen baılanys ornatý úshin tildi erkin meńgerý de qajet. Osy taqyrypta áńgime órbitseńiz.
- Shynymen de, bul mıssııa óte bilimdilikti ári tapqyrlyqty qajet etedi. Lıvanǵa keler aldynda Qazaqstannyń bitimgerler polkinde aǵylshyn tilin jete bilýge tyrystyq. Árıne, bul jerge kelgende jetik bilmesek te, ózge memleketterden kelgen áriptesterimizben, aǵylshyn tilin biletin jergilikti turǵyndarmen qarym-qatynas jasaıtyndaı deńgeıde aǵylshyn tilin meńgergenbiz. Qalaǵanymyzdy túsindirip, ózimiz de olardy emin-erkin túsine alamyz. Qazirgi ýaqytta qazaqstandyq bitimgerler Úndistannyń bitimger batalonynyń quramynda júrgenin ózderińiz de jaqsy bilesizder. ıAǵnı, biz úndilik áskerı qyzmetshilermen kúndelikti qarym-qatynastamyz. Iá, bir-birimizben qarym-qatynasymyz aǵylshyn tilinde ótip jatyr. Biraq, olardyń ana tilderi hındı tili bolǵandyqtan, sony da azdap úırenip úlgerdik dep aıta alamyn.
- Bıyl erekshe pandemııa jaǵdaıynda bitimgerlerimizdiń jumysy da qıyn kezeńge tap kelip otyr. Osy oraıda sizderdiń jumystaryńyz qalaı júrýde? Kedergiler bar ma?
- Álem elderiniń barlyǵyn sharpyǵan koronavırýs indeti Lıvanǵa da jetti, aınalyp ótken joq. El aýmaǵynda barlyq jer karantınge jabylyp, epıdemııaǵa qarsy is-sharalar tolyqtaı júrgizildi dep aıta alamyn. Biraq, bul sharalar bizdiń qyzmetimizge eshqandaı kedergi keltire almady. Biz saqtyq sharalaryn barynsha qabyldaı otyryp, moınymyzǵa júktelgen tarıhı mindetimizdi tolyqtaı júzege asyryp jatyrmyz. Bitimgerlerge vırýsty juqtyrý faktileri tirkelgen aýdandarǵa sapar jasamaý jáne jergilikti halyqpen baılanysty barynsha shekteý usynylǵan. Jeke qurammen koronavırýs ınfektsııasyn juqtyrýdyń aldyn alý jáne boldyrmaý boıynsha sabaq únemi ótkizilip turady.
- Ózińiz jaıly málimet bere ketseńiz. Qaı jerde týdyńyz, qandaı oqý ornyn bitirdińiz, áskerı qyzmette qansha jyl eńbek etip jatyrsyz?
- Almaty oblysynyń Jambyl aýdanyna qarasty Bertas aýylynda qarapaıym qazaq otbasynda 1995 jyly 1 mamyrda dúnıege kelgenmin. Keıin ata-anam osy óńirdiń Shılibastaý aýylyna qonys aýdaryp, sol jerde orta mektepti bitirdim. Sodan soń Qordaı aýyl sharýashylyǵy kolledjinde mal dárigeri mamandyǵy boıynsha bilim aldym. Al Otan aldyndaǵy áskerı boryshymdy Aqtóbe qalasyndaǵy 6655 áskerı bóliminde ótkerdim. 2016 jyly joǵary bilim dıplomyn alǵannan keıin Qapshaǵaı qalasyndaǵy Qazaqstan bitimgerlik polkine qabyldandym. Sol ýaqyttan beri Otan aldyndaǵy boryshymdy abyroımen atqaryp kelemin. Qazaqstan Respýblıkasynyń jáne qazaq halqynyń atynan osynaý elimiz úshin zor mártebe sanalatyn mıssııany atqarý men úshin úlken abyroı dep sanaımyn!
- Asqar, halyqaralyq kásibı merekemen shyn júrekten quttyqtaımyz! Jaýapty qyzmetińizdi abyroımen atqarýǵa jazsyn!