Lıvandaǵy BUU Ýaqytsha kúshteriniń shyǵys sektorynda Qazaqstan týy jelbiredi

ASTANA. QazAqparat - Lıvandaǵy Birikken Ulttar Uıymynyń Ýaqytsha kúshteri quramynda qyzmet etetin «BUU kógildir kaskasy» qataryn Qazaqstannan barǵan 120 bitimger tolyqtyrdy. Onyń mıssııasynyń basty mindeti - Lıvan-Izraıl shekarasyn baqylaý jáne Lıvandaǵy beıbitshilik pen qaýipsizdikti qoldaý. «BUU jańalyqtaryna» suhbat bergen  BUU janyndaǵy Qazaqstan  turaqty óklidiginiń áskerı attashesi, polkovnık Erulan Aqylbaev bitimgerlerdi qalaı daıyndaıtyndyǵy jaıynda aıtyp berdi, dep habarlaıdy QazAqparat tilshisi.

«Lıvandaǵy BUU Ýaqytsha kúshteriniń shyǵys sektorynda Qazaqstan týyn kóterý sharasy ótti. Bizdiń kontıngent mandattyq komıssııanyń óte qatań irikteýinen ótti. Olar jaqsy daıyndalǵan kásibı áskerı qyzmetshiler», - dedi áskerı attashe.

Erulan Aqylbaevtyń atap ótýinshe, áskerı qyzmetshilerge talap óte qatań. Olar óte jaqsy bazalyq daıyndyqtan ótip, fızıkalyq jáne psıhologııalyq turǵyda da saý bolýy tıis. BUU-nyń barlyq protsedýralary men standarttaryn, tártipke qoıylatyn talaptardy bilýleri qajet.

«Qazaqstandyq bilimgerler BUU aıasyndaǵy túrli bitimgerlik ortalyqtar ótkizetin kýrstardan daıyndyqtan ótti. Bizdiń ózimizde de Qurlyq áskerleri áskerı ınstıtýtynyń «Beıbitshilik úshin seriktestik» atty oqý ortalyǵy bar. Áskerı qyzmetshilerimiz tek qana Qazaqstanda emes, sonymen birge Úndistanda da úndilik bitimgerlermen birlese otyryp daıyndaldy», -  dedi ol.

Sonymen qatar áskerı attashe qazaqstandyq áskerı qyzmetshiler ornalasqan jerge jáne qyzmet barysyna oń baǵa berdi.

Aıta keteıik, bitimgershilik operatsııalarǵa qatysý kezeńinde áskerı qyzmetshiler Qorǵanys mınıstrliginiń bıýdjeti esebinen úsh rettik qarajatpen qamtamasyz etiledi.

Sondaı-aq, BUU jiberýshi kontıngentke BUU-nyń Bas assambleıasy bekitken mólsherlemeler boıynsha shyǵyndardy memleketke qaıtarady.  Bul aıyna áskerı qyzmetshige jumsalatyn 1428 AQSh dollaryn quraıdy. Ár áskerı qyzmetshige qosymsha retinde kúnine 1,28 AQSh dollary mólsherinde táýliktik qarajat, mıssııada ótkizgen ár 6 aıǵa usynylatyn 15 kúndik demalys úshin kúnine 10,5 AQSh dollary mólsherinde saýyqtyrý járdemaqysy tólenedi.