Lıvandaǵy peıdjerler jarylysy: «Hezbolla» Izraıldi aıyptap otyr

<p>ASTANA. KAZINFORM &ndash; 17 qyrkúıekte &laquo;Hezbolla&raquo; músheleri paıdalanatyn peıdjerler búkil Lıvanda bir ýaqytta jaryldy. Kem degende toǵyz adam qaza taýyp, úsh myńǵa jýyq adam jaraqat aldy. Bul oqıǵada &laquo;Hezbolla&raquo; Izraıldi aıyptady, dep jazady <a href="https://www.reuters.com/world/middle-east/what-we-know-so-far-about-deadly-pager-blasts-lebanon-2024-09-17/" target="_blank" rel="noopener">Reuters</a>.</p>

Lıvandaǵy «Hezbolla» qarýly tobynyń músheleri arasynda bir ýaqytta peıdjerlerdiń (daýys habarlamalaryn qabyldaıtyn symsyz telekommýnıkatsııalyq qurylǵylar) jarylýy saldarynan keminde toǵyz adam qaza taýyp, 3000-ǵa jýyq adam jaraqat aldy.

Reuters agenttiginiń habarlaýynsha, alǵashqy jarylystar 17 qyrkúıek kúni jergilikti ýaqyt boıynsha saǵat 15:30 shamasynda bolyp, Lıvannyń ártúrli aımaqtarynda, sonyń ishinde eldiń ońtústigi men el astanasy Beırýtte bir saǵatqa sozylǵan.

Agenttik qaýipsizdik kózderine jáne oqıǵa ornynan túsirilgen beınematerıaldardy taldaýǵa silteme jasaı otyryp, keıbir peıdjerlerdiń dybystyq sıgnaldan keıin jarylǵanyn, sondyqtan qurylǵylardyń ıeleri ekrandy tekserý úshin olardy ustap turǵanyn nemese «ne sıgnal ekenin túsiný úshin» peıdjerlerge jaqynnan úńile qarap turǵanyn atap ótti.

Reuters taldaýyna sáıkes, jarylystar álsiz bolǵanymen, qurylǵynyń ıesi nemese oǵan jaqyn turǵan adamdar zardap shekken.

Lıvan qaýipsizdik kúshterindegi joǵary laýazymdy tulǵalarynyń aıtýynsha, Izraıldiń «Mossad» barlaý agenttigi jarylystardan birneshe aı buryn Hezbolla tapsyrys bergen 5000 peıdjerge jarylǵysh zat qoıǵan.

Agenttik suhbattastarynyń biri bul top Taıvannyń Gold Apollo kompanııasyna peıdjerlerge tapsyrys bergenin jáne qurylǵylardyń Lıvanǵa osy jyldyń basynda ákelingenin aıtty. Kompanııa qurylǵylardy óndirmegenin málimdegen jáne olardy Taıvan óndirýshisiniń brendin paıdalanýǵa quqyǵy bar eýropalyq fırma jasaǵanyn aıtty.

Aıtýlarynsha, «Hezbolla» músheleri uıaly telefondardy tastap, Izraıl olardyń ornalasqan jerin baqylaı almaıtyndaı etip peıdjerlerge kóshken. Jarylǵan qurylǵylar sońǵy aılarda ákelingen peıdjerdiń sońǵy úlgileri boldy, deıdi agenttik derekkózderi.

Hezbolla resmı túrde bul oqıǵa úshin Izraıldi aıyptap, «ádil jaýap berýge» ýáde berdi. Izraıl peıdjerlerdiń jarylýy týraly aqparatqa áli túsinikteme bergen joq.

Aıta keteıik, buǵan deıin Lıvandaǵy peıdjerler jarylysynan júzdegen «Hezbolla» múshesi jaraqat alǵany týraly jazǵan edik.