Lıvanda qazaqstandyq bitimger marapattaldy

BEIRÝT. QazAqparat – Lıvanda BUU-nyń bitimgerlik mıssııasyna qatysyp jatqan qazaqstandyq áskerı qyzmetshi aǵa serjant Vıacheslav Moor marapattaldy, dep habarlaıdy QazAqparat tilshisi.

QR Qorǵanys mınıstrliginen málim etkendeı, bıylǵy tamyz aıyn qorytyndylaý kezinde Úndi bitimgerlik batalonynyń komandıri Lıvan Respýblıkasyndaǵy qazaqstandyq bitimgerlerdiń qyzmetine oń baǵa berdi.

Osylaısha, jaýyngerlik jáne bitimgerlik daıarlyq boıynsha úzdik kórsetkishteri, joǵary áskerı tártibi úshin «Shyǵys» óńirlik qolbasshylyǵynyń 44736 áskerı bóliminiń aǵa serjanty Vıacheslav Moorǵa baǵaly syılyq tabys etilgen.

«4-shi jıyntyq bitimgerlik rotasy bıylǵy 1 tamyzda Úndi bitimgerlik batalony quramyndaǵy mıssııany oryndaýǵa kiristi. Oǵan Qazaqstannyń túrli áskerı bólimderinen úzdik 120 ofıtser men kelisimshart boıynsha áskerı qyzmetshiler kirdi», - dedi mınıstrlikten.

Esterińizge sala keteıik, qazaqstandyq bitimgerlerdiń Lıvanda júrgenine bir jarym jyl boldy. Osy ýaqyt ishinde olar ózderin tek jaqsy jaǵynan kórsete bildi.