Lıvan Prezıdenti elordada ótetin IYU sammıtine shaqyrý aldy
Beırýtta QR Syrtqy ister mınıstriniń orynbasary Aqylbek Kamaldınov Lıvan Respýblıkasynyń Prezıdenti Mıshel Aýnmen kezdesti. Kezdesý barysynda Lıvan memleketiniń basshysyna Qazaqstan Respýblıkasynyń Prezıdenti Nursultan Nazarbaevtyń 2017 jyldyń 10-11 qyrkúıeginde Astanada ótetin Islam yntymaqtastyq uıymynyń ǵylym men tehnologııa jónindegi birinshi sammıti jumysyna qatysýǵa shaqyrýy tabys etildi.
QR Prezıdentiniń arnaıy ókili Lıvan Respýblıkasynyń basshysyn sammıtke daıyndyq barysymen tanystyrdy. Sonymen qatar ol qazaqstandyq-lıvandyq qarym-qatynastyń qazirgi jaı-kúıi men keleshegi jaıynda aıta kele, Beırýttyń Qazaqstannyń BUU Qaýipsizdik Keńesine turaqty emes múshe bolyp saılanýyna kórsetken qoldaýy úshin rızashylyq bildirdi.
Shaqyrýdy qabyl alǵan Lıvan Prezıdenti M.Aýn elordamyzda ótetin IYU sammıtine qatysý múmkinshiligin bergen Qazaqstan Prezıdenti N.Nazarbaevqa rızashylyǵyn bildirdi. Lıvan basshysynyń paıymynsha, eki eldiń ózara tıimdi yntymaqtastyqty damytýǵa áleýeti óte zor.
M.Aýn Qazaqstannyń jáne onyń Prezıdenti N.Nazarbaevtyń sırııalyq daǵdarysty saıası retteýde kelissózder júrgizý úshin múddeli taraptarǵa alań usynýdaǵy kúsh-jigerin joǵary baǵalady. Sonymen qatar ol Astana protsesi uzaq jyldarǵa sozylǵan janjaldyń aıaqtalýyna sep bolaryna úmit artatyndyǵyn bildirdi.