Lıvan men Izraıl áskeri shekarada kózden jas aǵyzatyn gaz qoldandy

<p>Senbi kúni Lıvan armııasy óz áskerlerine atylǵan tútin bombalaryna jaýap retinde Izraıl áskerlerine kózden jas aǵyzatyn gaz qoldanǵanyn habarlady. Óz kezeginde Izraıl teketiresti birinshi bolyp Lıvan bastaǵanyn málimdedi, dep habarlaıdy <a href="https://kaz.inform.kz/" target="_blank" rel="noopener">QazAqparat </a>bul týraly <a href="https://www.reuters.com/world/middle-east/lebanese-army-says-troops-exchange-tear-gas-smoke-bomb-fire-with-israeli-forces-2023-09-23/" target="_blank" rel="noopener">Reuters </a>agenttigine silteme jasap.</p>

Taıaý Shyǵys elderi arasyndaǵy shekaralyq shıelenis sońǵy birneshe aıda kúsheıe tústi. Izraıl-Palestına qaqtyǵysy ýshyǵyp, Lıvandaǵy «Hızballa» tobynyń músheleri men onyń jaqtastary Izraıl kúshterimen qaqtyǵysqan kezde Izraılge zymyrandar atyldy.

«Izraıldik jaý áskeri burylys syzyǵyn buzyp, Lıvan armııasynyń patrýline tútin bombalaryn jiberdi», – delingen Lıvan armııasynyń málimdemesinde.

Eki el arasyndaǵy qazirgi demarkatsııa syzyǵy «kók syzyq» dep atalady. Ol - BUU kartaǵa túsirgen jáne Izraıl áskerleri 2000 jyly Ońtústik Lıvannan ketken kezde shegingen syzyqty belgileıtin shekara.

«Lıvandyq patrýl shabýylǵa kózden jas aǵyzatyn gaz qoldaný arqyly jaýap berdi... olardy basyp alynǵan Palestına aýmaqtaryna ketýge májbúr etti», - dep qosty Lıvan armııasy.

Izraıl áskeri zorlyq-zombylyqty Lıvan tarapy bastaǵanyn aıtady.

«Jaqynda TsAHAL áskeri (Izraıl qorǵanys kúshteri) Lıvannan Dov taýy aımaǵyndaǵy Izraıl aýmaǵyna «kók syzyqty» kesip ótken ınjenerlik mashına shómishin kórgen. Buǵan jaýap retinde TsAHAL sarbazdary tártipsizdikterdi joıý quraldaryn qoldandy»,- delingen Izraıl áskerı kúshteriniń málimdemesinde.

Osydan keıin ınjenerlik kólik Lıvanǵa oralǵan.

BUU-nyń Lıvandaǵy ýaqytsha Kúshteri (BUUDB), «kók syzyq» boıynda ornalasqan BUU bitimgershilik kúshteri senbide shıelenis bolǵanyn aıtty.