Lıvan halqy Qazaqstan bitimgerlerine qurmetpen qaraıdy - Bahram Ansardın

NUR-SULTAN. QazAqparat – 2002 jyly BUU Bas Assambleıasy 29 mamyrdy Halyqaralyq bitimgeler kúni etip bekitti. Bul kún álem boıynsha qyzmet etip júrgen bitimgerlerdiń janqııarlyqtaryna alǵys bildirýge úndeıdi. Atap aıtqanda, Qazaqstan tarapy da osy mańyzdy mıssııaǵa óziniń eleýli úlesin qosyp keledi. 2018 jyldyń qazanynan bastap 2019 jyldyń mamyr aıyna deıin Lıvandaǵy BUU mıssııasyna 120 áskerı qyzmetshiden quralǵan alǵashqy bitimgershilik rota qatysty. 2019 jyldyń mamyr aıynda onyń ornyna alty aı merzimge ekinshi bitimgershilik rota jiberilip, 120 áskerı qyzmetshiden quralǵan bólimshe qarasha aıyna deıin mıssııada boldy. Qazirgi kezde úshinshi Qazaqstandyq bitimgershilik rotasy úndistandyq batalon quramyndaǵy BUU-nyń Lıvandaǵy bitimgershilik mıssııasyn jalǵastyrýda. Osy oraıda atalǵan mıssııa aıasynda qyzmet etip júrgen 23 jastaǵy qazaqstandyq kishi serjant Bahram Ansardınnen suhbat alýdyń sáti tústi.

- Bahram, jarty jyldan astam ýaqyt Lıvanda bitimgerilik mindetti atqaryp júrsizder. Elge oralý ýaqyty qashanǵa belgilendi?

- 2019 jyldyń qarasha aıynan bastap Lıvandamyz. Negizi, osynda jarty jyl bolýymyz kerek edi, alaıda koronavırýs ınfektsııasyna baılanysty karantın jarııalanýyna oraı, osyndaǵy qyzmetimiz birshama ýaqytqa sozylatyn boldy. Biz shamamen tamyz aıynda elge oralamyz dep josparlap otyrmyz. Pandemııaǵa baılanysty mıssııa qolbasshylyǵy vırýstyń taralýynyń aldyn alý baǵytynda qajetti saqtyq sharalaryn qabyldady.

- Lıvanda qazaqstandyq sarbazdarǵa qandaı mindetter júktelgen?

- Mıssııa aıasynda patrýlge shyǵamyz, qoǵamdyq tártipti qaraımyz. Osy oraıda bitimgershilik rotasy Úndi batalonymen birlesip tıisti mindetterdi oryndaıdy. Sonymen qatar, blokposttarda qyzmet atqaramyz, áskerı bazalardyń kúzetilýi úshin jaýap beremiz. Aıta keteıin, osy elge keler aldynda Qazaqstanda egjeı-tegjeıli daıyndyqtan óttik. Osy tyńǵylyqty daıyndyqtardyń arqasynda Lıvanda aldymyzǵa qoıylǵan tapsyrmalardy laıyqty deńgeıde oryndap júrmiz dep aıtýǵa bolady. Munda aýa temperatýrasy 40 gradýsqa deıin kóteriledi. Bir táýlik kezekshilikte bolsaq, kelesi kúni demalamyz. Jarty jyl ishinde osyndaǵy tártipke ábden úırenip aldyq. Eger de aldaǵy ýaqytta mundaı bitimgershilik rotamen taǵy da jiberse, kóp oılanbastan birden keliser edim.

- Elimizde bitimgerlerdi daıyndaý talaptary týraly aıtyp berseń?

- Bitimgershilikke ózimniń qalaýymmen bardym. Bul rette aldymen óz atymyzdan ótinish jazamyz, sondaı-aq ata-anamnyń kelisimin aldym. Lıvanǵa barmas buryn úsh kezeńinen turatyn irikteýden óttik. Osy oraıda medıtsınalyq, psıhologııalyq testileýdi jáne basqa da synaqtardy eńserdik. Polıgon jaǵdaıynda alty aılyq daıyndyq boldy. Ol jerde shet tilin úırendik. Bul turǵyda shet tilin meńgerýge nazar aýdarylady, ıaǵnı qazaq, orys, aǵylshyn tilderin erkin meńgerdim. Qyzmet barysynda Úndi sarbazdarymen tyǵyz qarym-qatynastamyz. Olarmen birge blokpostqa túsemiz, patrýlge shyǵamyz. Negizi, úndiler meıirban ári kishipeıil adamdar. Sondyqtan olarmen tez arada dostasyp aldyq.

- Bizdiń sarbazdardyń quraldarmen, kıimmen jáne ózge de qajetti zattarmen jabdyqtalýy deńgeıin qalaı baǵalar ediń?

- Memleketimiz sarbazdardy qajetti qarýmen jáne oq-dárimen, jeke jáne arnaýly jabdyqpen tolyqtaı qamtamasyz etken. Olardyń barlyǵy zamanaýı jabdyqtar. Qazaqstannan barǵan 120 adam úshinshi Qazaqstandyq bitimgershilik rotasy úndistandyq batalon quramyndaǵy BUU-nyń Lıvandaǵy bitimgershilik mıssııasyn jalǵastyrýda. BUU mıssııasynda Qazaqstan bitimgerlerine tólenetin eńbekaqy mólsherine de kóńilimiz tolady. Jalpy, sarbazdardy qamtamasyz etý deńgeıin jaqsy baǵalaımyn. Búginde biz ornalasqan bazada sarbazdarǵa qolaıly jaǵdaı jasalǵan. Dene shynyqtyrýmen aınalysý úshin jabdyqtalǵan sport zaly bar.

- Qazir Lıvandaǵy jaǵdaı qalaı? Jergilikti turǵyndardyń bitimgerlerge degen kózqarasy qandaı?

- Patrýldik baqylaý kezinde tosyn jaǵdaılar bolyp jatsa, Lıvannyń áskerin shaqyramyz. Jergilikti armııanyń ókilderi tıisti sheshim jasaıdy. Patrýlge shyqqanda jergilikti turǵyndardyń bizge degen jaqsy kózqarasyn baıqaımyz. Atap aıtqanda, Qazaqstan memleketine degen syılastyq peıilderin kórsetip jatady.

- Bahram, ýaqyt taýyp suhbat bergeniń úshin kóp raqmet! Jaýapty ári abyroıly bitimgerlik isińe tabys tileımiz!