Lıtvada alǵash ret toǵyzqumalaqtan jarys ótti

NUR-SULTAN. QazAqparat - Lıtva astanasy Vılnıýste Qazaqstannyń Lıtvadaǵy Elshiligi, Dúnıejúzilik toǵyzqumalaq federatsııasy jáne «Santoros» astanalyq gımnazııasynyń ákimshiligi birlese otyryp, osy elde alǵash ret qazaqtyń logıkalyq ulttyq oıyny - toǵyzqumalaqtan master-klass jáne jarys uıymdastyrdy, dep habarlaıdy QazAqparat tilshisi.

QR Toǵyzqumalaq federatsııasy málim etkendeı, jarysqa 23 sportshy, onyń ishinde gımnazııa oqýshylary men muǵalimderi qatysty. Jarys jeńimpazdary, sondaı-aq oıynnyń barlyq qatysýshylary Qazaqstannan estelik syılyqtardy aldy.

Jeńimpazdardy marapattaý kezinde, QR Lıtvadaǵy Elshisi V.Temirbaev oqýshylarǵa oıyn tarıhymen, ózderiniń Qazaqstandaǵy qurdastarynyń ómiri týraly aıtyp, sondaı-aq olarǵa toǵyzqumalaq oınaý daǵdylaryn eresek ómirde paıdaly bolatynyn túsindirdi.

Jarys barysynda toǵyzqumalaqtan álemniń birneshe dúrkin chempıony S.Aqataev oıyn strategııasy men jedel jeńisteriniń qupııasymen tanystyryp qana qoımaı, qatysýshylarǵa osy kóshpeli oıynǵa qatysty qyzyqty áńgimeler aıtyp berdi.

Elshiliktiń jáne federatsııanyń osy jarystardy dástúrli túrde jyl saıyn ótkizip turý jospary bar. Qazirdiń ózinde birneshe mekteptiń oıynshylary qazaqtyń ulttyq oıynyn meńgerýge qyzyǵýshylyq tanytyp otyr.

Lıtvadaǵy toǵyzqumalaqtan master-klass jáne jarys sektsııasy Qazaqstan Elshiligi men Dúnıejúzilik toǵyzqumalaq federatsııasynyń «Rýhanı jańǵyrý» baǵdarlamasynyń, sondaı-aq Elbasynyń «Uly dalanyń jeti qyry» maqalasyn qoldaý negizinde ótti.