Lıtva ýnıversıtetteri qazaqstandyqtar úshin 200-den astam grant bóldi

ASTANA. QazAqparat - Almaty men Shymkent qalalarynda Lıtva ýnıversıtetteriniń aqparattyq sessııasy ótedi, dep habarlaıdy QazAqparat «Halyqaralyq baǵdarlamalar ortalyǵy» AQ saıtyna silteme jasap.

Onda qazaqstandyqtar Lıtvadaǵy JOO-larda bakalavrıat jáne magıstratýra baǵdarlamalary, oqýǵa túsý úrdisi, grant pen stıpendııa jóninde bile alady. Sondaı-aq, grantqa oqýǵa túskenderdiń arasynan áleýmettik jaǵdaıy tómen stýdentterge aı saıyn beriletin stıpendııa qarastyrylmaq.

Shymkent qalasyndaǵy kezdesý Jastar resýrstyq ortalyǵynda (Momyshuly kóshesi 4) 11 naýryzda saǵat 10:00-de ótedi.

Almaty qalasyndaǵy kezdesý 13 naýryzda saǵat 10:00-de Ulttyq kitaphanada (Abaı dańǵyly 14) uıymdastyrylady.

Aıta keterligi, Qazaqstannyń basqa qalalary men aımaqtaryndaǵy úmitkerler qujattaryn Lıtvanyń joǵary oqý oryndarynyń resmı saıttaryna 1 aqpanynan bastap joldaýy kerek.

Lıtva ýnıversıtetteriniń baǵdarlamalary men mamandyqtary myna siltemelerde: Vytautas Magnus University, Kaunas University of Technology, Lithuanian Sports University.