Lıga kýbogy: «Aqjaıyq» kútpegen jerden «Qyzyljardy» utyp ketti

<p>ORAL. KAZINFORM &mdash; Lıga kýbogynyń úshinshi týrynda Oraldyń &laquo;Aqjaıyǵy&raquo; óz alańynda Petropavldyń &laquo;Qyzyljaryn&raquo; qabyldady.</p>

Petropavldyqtar Premer-lıgada týrnır kestesinde 10-orynda kele jatsa, birinshi lıgada oınap júrgen oraldyqtardyń jaǵdaıy máz emes-ti.

Bıyl qarjy qıyndyǵyna tap bolǵan «Aqjaıyq» Aqtóbedegi kezdesýine bara almasa, odan keıin óz alańynda Astananyń «SD Family» komandasyn 2:1 esebimen utqan edi. Sonda da birinshi lıgada 14-orynnan joǵary kóterile almaǵan oraldyq klýb búgin «Qyzyljardy» jeńip ketti. 

Foto: Aıbatyr Nurash

Birinshi taımda alań ıelerinen 13-mınýtta Shyńǵys Qubashev esep ashty. Sodan keıin qyzyljarlyq Ular Jaqsybaev 40-mınýtta óz qaqpasyna gol soǵyp aldy. Tek 94-mınýtta qonaqtar sapynan Senın Sebaı esepti qysqartty. Qorytyndy esep – 2:1, «Aqjaıyqtyń» paıdasynda. 

Foto: Aıbatyr Nurash

Osylaısha, lıga kýbogynda «Aqjaıyq» úsh upaıǵa qol jetkizdi. 

Foto: Aıbatyr Nurash

Eske sala keteıik, budan buryn «Aqjaıyq» oıynshylarynyń chempıonat matchyna qatysýdan bas tartqanyn jazǵan bolatynbyz.