LGBT qozǵalysy elimizde ekstremıstik dep tanylýy múmkin be
«Quqyq qorǵaý organdarynyń derekteri boıynsha elimizde «Kaleıdoskop», «Feminita» jáne «KazFem» degen 3 beıresmı birlestik jumys isteıdi, olardyń qyzmeti dástúrli emes jynystyq baǵyttaǵy áıelderdiń quqyqtary men bostandyqtaryn qorǵaýmen, onyń ishinde qoǵamda LGBT-qoǵamdastyǵynyń ókilderine degen tolerantty kózqarasty ilgeriletýmen baılanysty. Kórsetilgen birlestikter bıyl jergilikti atqarýshy organdarmen kelispeı, toptyq aktsııalar uıymdastyrǵan. Bul jaǵdaıda olardyń áreketi Qazaqstan Respýblıkasynyń beıbit jınalystardy uıymdastyrý jáne ótkizý tártibi týraly zańnamasyn buzý bolyp saralandy (ÁQBtK-niń 488-baby boıynsha 2 belsendi ákimshilik jaýapkershilikke tartyldy). Óz kezeginde LGBT qozǵalysyn ekstremıstik dep tanýdy halyqaralyq quqyq qorǵaý uıymdary azamattardyń senim bildirý jáne qoǵamdyq birlestikterge qatysý bostandyǵy quqyqtaryn buzý retinde qarastyrýy múmkin», - dedi Úkimet basshysy jaýabynda.
Onyń atap ótýinshe, birqatar eldiń zańnamasy LGBT-ny kámeletke tolmaǵandar arasynda «nasıhattaýdy» shekteıdi. Alaıda bul sharalar tek buqaralyq turǵydan qarastyrylady jáne mundaı qozǵalystardy ekstremıstik dep jikteýge qatysy joq.
«Sonymen birge bıyl Mádenıet jáne aqparat mınıstrligi LGBT-ny ashyq jáne jasyryn nasıhattaýǵa qarsy petıtsııany qaraıtyn jumys tobyn qurdy. Onyń quramyna Parlament depýtattary, qoǵamdyq birlestikterdiń, múddeli memlekettik organdardyń ókilderi kirdi. Nátıjesinde «jasóspirimder men balalardy seksýaldyq qatynastardy nasıhattaýdan qorǵaý, saqtaý týraly» talap bóliginde petıtsııany ishinara qanaǵattandyrý týraly sheshim qabyldandy. Osyǵan baılanysty qazirgi ýaqytta múddeli memlekettik organdar LGBT qozǵalysynyń kámeletke tolmaǵandarǵa áleýmettik, psıhologııalyq, medıtsınalyq jáne basqa yqpal etý faktorlaryn zertteýde. Budan basqa, 2025 jyly osy másele boıynsha ǵylymı-zertteý jumysyn júrgizý josparlanǵan. Barlyq qajetti zertteýler aıaqtalǵannan keıin osy salany retteý boıynsha qoǵamdyq talqylaý uıymdastyrylady. Jalpy másele ýákiletti organdar men Úkimettiń baqylaýynda», - dedi Úkimet basshysy.
Aıta keteıik, Májilis depýtaty Rınat Zaıytov femınıta qaýymdastyǵyna Qazaqstan Respýblıkasynyń aýmaǵynda shekteý qoıý kerek ekenin málim etken bolatyn.