LGBT kontent balanyń ishki dúnıesi men jynystyq tańdaýyna áser ete me – psıholog pikiri

NUR-SULTAN. QazAqparat – Qoǵamda sheteldik «Bazz Laıter» anımatsııalyq fılmin Qazaqstanda kórsetýge qatysty pikir ekige bólinip jatyr. Biri qarsy bolsa, ekinshisi qandaı zańǵa súıenip tyıym salynǵanyn, tańdaý erkindigi qaıda qalǵanyn suraıdy. Osy oraıda, QazAqparat tilshisi kez kelgen kontenttiń, onyń ishinde LGBT kontenti balanyń dúnıetanymy men jynystyq tańdaýyna qalaı áser etetini týraly psıhologtardyń pikirin tyńdap kórgen edi.

«Balanyń dúnıetanymyna ol qaraıtyn kontenttiń bári áser etedi. Osylaısha, onyń óz álemi qalyptasady. Bala qaraıtyn kontent neǵurlym ártúrli bolsa, onyń álemdi tanýy da soǵurlym naqty bolady. Ata-anaǵa júkteletin jaýapkershilik – bala qaraıtyn, tyńdaıtyn kontenttiń biryńǵaı nemese shamadan tys kóp bolmaýyn retteý. Kontenttiń balaǵa jynystyq jaǵynan áserine toqtalsaq. Jynystyq tańdaý adamǵa týa bitedi. Jaratylysqa qarsy shyǵa almaısyń. Tipti, LGBT mazmundy kontent te balanyń ishki dúnıesi men jynystyq tańdaýyn ózgerte almaıdy», - dedi psıholog Qalamqas Qanapıeva.

Mamannyń aıtýynsha, bala kez kelgen dúnıege qyzyǵa qaraıdy, kórgisi keledi, bilgisi keledi. Al, oǵan tyıym salýdyń keri áseri bolýy múmkin.

«Eshqandaı mýltfılm, onyń ústine 5-6 sekýndtyq kadr balanyń jynystyq tańdaýyn ózgerte almaıdy. Mýltfılmdi prokattan alyp tastaý – qorqynysh, úreıdiń belgisi. Tyıym salýdyń keri áseri – balalar men jasóspirimder erkindik izdep ketedi. Nátıjesinde kim bolady, ne isteıdi, sheshimdi ózderi qabyldaıdy», - deıdi ol.

Aty-jónin kórsetpeýdi suraǵan ekinshi psıholog mýltfılmniń sheteldik ekenin jáne olardyń óz mádenıeti men ustanymy baryn aıtty.

«Adamdar hot-dog, chızbýrger jeıdi. Bul – sheteldiń tamaǵy, ony jemeńder dep tyıym salmaıdy ǵoı. Onyń ústine, fast-fýdtyń zııanyn bárimiz bilemiz. Zııan ekenin bile turyp, ony balalarǵa beremiz. Kıimge qatysty da solaı. Sondyqtan, tyıym salamyz desek, ilik tabylady. Árıne, birjynystyq qarym-qatynasty nasıhattap, taratýǵa qarsymyz. Biraq, ol týraly bilýimiz de kerek», - deıdi maman.

Psıhologtyń pikirinshe, mýltfılm rejısseri atalǵan kadrdy LGBT-ny jarnamalaý úshin emes, adamdardyń habary bolsyn degen maqsatta josparly túrde engizgen bolýy da múmkin.

«Shynyn aıtqanda, másele kúrdeli. Sebebi, jynystyq, onyń ishinde birjynystyq qatynas máselesin balaǵa aıtqan durys pa, álde múldem qozǵamaǵan jón be? Bir jaǵynan, balanyń bilip óskeni durys. Qazir estimese, erteń estıdi. Batys elderinde bul másele sheshilgen, ashyq aıtylady jáne zańmen rettelgen», - dedi spıker.

Óz kezegimizde Qazaqstanda «Bazz Laıter» anımatsııalyq fılmin prokatqa shyǵarýǵa tyıym salýǵa qatysty Mádenıet jáne sport mınıstrliginen resmı túsinikteme berýin suradyq. Atalǵan vedomstvonyń baspasóz qyzmeti jaýap berýge ýáde etti.

Eske salsaq, keshe Mádenıet jáne sport mınıstri Dáýren Abaev qyzý talqyǵa túsken «Bazz Laıter» anımatsııalyq fılmi Qazaqstan kınoteatrlarynda kórsetilmeıtinin málimdegen edi.

Foto: claudia.abril.com.br