Leonıd Prokopenko: Atyraý - qazaq jeriniń júregi

ATYRAÝ. QazAqparat - Qazaqstan halqy Assambleıasynyń «Qazaqtaný» aýqymdy jobasyn júzege asyrý aıasynda Atyraýda teatrlandyrylǵan kontserttik baǵdarlama uıymdastyryldy, ony 1500-den astam kórermen tamashalap, 1 myńǵa jýyq adam qatysty, dep habarlaıdy Atyraý oblystyq óńirlik kommýnıkatsııalar qyzmeti.

Jobanyń basty maqsaty - barlyq qazaqstandyqtardyń birtutas qundylyqtarynyń jáne jalpyulttyq tarıhı sanasynyń negizinde halyq birligin nyǵaıtý.

Sharaǵa halqy Assambleıasy Tóraǵasynyń orynbasary - Hatshylyq meńgerýshisi Leonıd Prokopenko, Atyraý oblysynyń ákimi Nurlan Noǵaev, Qazaqstan halqy Assambleıasynyń, Analar keńesiniń músheleri, kórnekti qoǵam qaıratkerleri, QHA ǵylymı-sarapshylyq keńesi men etnomádenı birlestikterdiń músheleri,  memlekettik organdar men respýblıkalyq jastar birlestikteriniń, joǵary oqý oryndarynyń, qoǵamdyq kelisim keńesteriniń ókilderi, qoǵam qaıratkerleri, jazýshylar jáne BAQ qatysty. 

Aıta ketý kerek, Atyraý oblysynda 80-nen astam ult pen ulys ókilderi turady, 20-dan astam etnomádenı birlestik jumys isteıdi. Sharaǵa qatysýshylar «Qazaqtaný» jobasy etnosaralyq kelisimniń úılesimdi bolýyna yqpal etetin quralǵa aınalǵanyn atap ótti.

Bul pikirdi sharada sóz alǵan aımaq basshysy Nurlan Noǵaev ta qýattady:

- Bul aýqymdy joba bizdiń tilimiz ben dilimiz, dinimiz bólek bolǵanyna qaramastan, maqsattarymyz ortaq ekenin taǵy da aıqyndap berdi. Memleket basshysynyń halyqtyń ál-aýqatyn kóterýge qatysty qoıǵan mindetterin atqarýǵa daıynbyz. Búginde Qazaqstanda beıbitshilik, kelisim men turaqtylyq bar. Bul bárimizdiń eńbegimiz. Biz memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý aıasynda ulttyq qundylyqtardy nyǵaıtý úshin barlyq kúsh-jigerimizdi biriktiremiz», - dedi Atyraý oblysynyń ákimi. 

Aıta ketý kerek, Qazaqstan halqy Assambleıasynyń «Qazaqtaný» jobasy Assambleıanyń memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyn iske asyrý aıasynda qosqan úlesi. Bul biregeı joba qazaqtyń baı mádenıetine, tarıhy men dástúrine tereń boılap, kóshpendi halyqtyń kóp ǵasyrlyq fılosofııasyn túsinýge múmkindik beredi.

- 2018 jyly jobamyz Atyraýda aıaqtalatynyna qýanyshtymyn, sebebi Atyraý - qazaq jeriniń júregi. Munda baǵzy dástúrler berik saqtalǵan, Saraıshyq qalashyǵy ornalasqan kıeli meken. Bul - Prezıdent «Uly dalanyń jeti qyry» maqalasynda atap kórsetken bizdiń tarıhymyz. Maqsatymyz - joba aıasynda ortaq tarıhı sana qalyptastyrý bolatyn, osy maqsat oryndaldy, - dedi Leonıd Prokopenko. 

Aıta keteıik, sharalar legi Qazaqstan halqy Assambleıasy uıymdastyrǵan «Qaıyrymdylyq kerýeni» jobasy sheńberinde metsenattar forýmymen qorytyndylandy. Eń úzdik qaıyrymdylyq uıymdary, donorlar men metsenattar memleket basshysy bekitken «Jomart jan» tósbelgisine ıe boldy. Qaıyrymdylyqty damytýǵa, bıznestiń áleýmettik jaýapkershiligin, qoǵamdyq kómek berý mádenıetin dáripteýge úles qosyp júrgen 32 metsenat «Jomart jan» tósbelgisimen jáne 11 metsenat alǵys hatpen marapattaldy.