Lenın shahtasy jabylmaıdy, munda áli 10 jylǵa jetetin kómir qory bar – Jeńis Qasymbek

QARAǴANDY. QazAqparat – Qaraǵandy oblysynyń ákimi Jeńis Qasymbek apat jıi tirkeletin Lenın atyndaǵy shahta jabylmaıtynyn aıtty, dep habarlaıdy QazAqparat tilshisi.

Óńirlik kommýnıkatsııalar qyzmetinde ótken brıfıngide oblys ákimi atalǵan shahtada áli 10 jylǵa jetetin kómir qory bar ekenin aıtty.

«Shahta konservatsııalanbaıdy. Mundaǵy jumystar komıssııa jumys istep turǵan kezde ǵana toqtap turady. Apat sebepteri anyqtalǵannan keıin jáne saldary joıylǵannan keıin shahta ári qaraı jumys isteı beredi», - dedi ol.

Sondaı-aq, aımaq basshysy atalǵan shahtanyń «resýrsy aıaqtalýǵa jaqyn» degen málimetterdi joqqa shyǵardy.

«Shahtanyń resýrsy degen uǵym joq. Eger qazýǵa bolatyn kómir bolsa, kómir qory jumys isteýge múmkindik berip tursa, búkil kólem tolyq qazyp alynǵansha shahta jumys isteı beredi. Mamandardyń deregi boıynsha, búginde bul shahtadan 10 mln tonnaǵa deıin kómir qazyp alýǵa bolady. Orta eseppen jyl saıyn 1 mln tonna kómir qazyp alady desek, 10 jyldyń jumysy bar degen sóz. Onyń ózinde qosymsha qatparlardy barlap, ıgermeıtin bolsa osyndaı merzim boıy jumys isteıdi», - dedi Jeńis Qasymbek.