Leffler revansh týraly: Basynda Alvaresti ustaı almadyq, endi Gennadııdi kútip júrmiz

ASTANA. QazAqparat - GGG-diń promoýteri Tom Leffler meksıkalyq boksshy Saýl Alvareske qarsy revanshtyń kelissózderi ne sebepti uzaryp ketkenin túsindirdi, dep habarlaıdy QazAqparat Sports.kz-ke silteme jasap.

«Másele mynada, alǵashqy jekpe-jekten keıin «Kanelo» birden shetelge ketip qaldy. Áıtpese, Erık Gomes ekeýimiz revansh máselesin eki aptanyń ishinde sheship alatyn edik. Sodan «Kanelonyń» jaýabyn kútýge týra keldi. Endi, Gennadıı Qazaqstanǵa ketip qaldy. Sóıtip, basynda Alvaresti ustaı almasaq, endi Gennadııdi kútip júrmiz. Aldaǵy ýaqytta Los-Anjeleste  bárimiz bir ústeldiń basynda jınalyp, kelissózderdi jalǵastyratyn bolamyz», - deıdi T.Leffler.

Promoýterdiń aıtýynsha, Gennadıı Golovkın men Saýl Alvarestiń revanshy boıynsha kelissózderge naqty dedlaın qoıylǵan joq.

«Biz áli naqty kelisimge kelgen joqpyz. Alaıda kelissózder oıdaǵydaı ótedi dep oılaımyn. Sebebi dál qazir eshqandaı qıyndyq joq», - dep atap kórsetti T.Leffler.

Aıta keteıik, buǵan deıin «Golden Boy Promotions» kompanııasynyń prezıdenti Erık Gomes kelissózderdiń aıaqtalýǵa jaqyn ekenin málimdegen bolatyn. Alaıda eki jaq revanshty ótkizetin jerdi áli anyqtaǵan joq. Eger ekinshi jekpe-jek qaıtadan Las-Vegasta ótse, ádilsiz tóreshilikke taǵy jol beriledi degen boljam bar. Soǵan qaramastan, Saýl Alvarestiń komandasy revanshty dál sol jerde ótkizýge múddeli.