Lázzat Súıindik Qazaqstanda aýdıtorııasy artyp kele jatqan telearnalardy atady

NUR-SULTAN. QazAqparat – Salalyq telearnalardyń máselesi kóterilgen Astana Media Week sharasynda QR Aqparat jáne qoǵamdyq damý mınıstrligi Aqparat komıtetiniń tóraıymy Lázzat Súıindik keıingi jyldary maqsatty aýdıtorııasy ósip kele jatqan otandyq telearnalardy atady, dep habarlaıdy QazAqparat tilshisi.

«2010 jyly Elbasynyń tapsyrmasy boıynsha mınıstrliktiń qoldaýymen «Balapan» telearnasy ashyldy. Ol kezde telearnanyń kórermeni az edi. Qazir jaǵdaı basqa. Búgingi tańda «Balapan» telearnasynyń Youtube arnasyndaǵy qaralymdarynyń sany mol. Arna kontentti qazaq tilinde júrgizip otyr. Qazir bizde tyń joba bar. Biz «Mýlt» arnasynyń mýltfılmderin satyp alyp jatyrmyz. Qazirdiń ózinde «Mýlt» arnasynyń 30 paıyzy qazaq tilinde «Balapan» arqyly berilýde. Kelesi jyly «Mýlt» arnasynyń 50-60 paıyzyn qazaq tilinde shyǵarýdy kózdep otyrmyz. Álbette, ózindik ónim kerektigin túsinemiz», - dedi Lázzat Súıindik.

Sonymen birge, komıtet tóraıymy otandyq telearnalardyń altyn qory baryn eske saldy.

Onyń aıtýynsha, qazaq kınosynyń altyn qory «El Arna» telearnasynyń ashylýyna muryndyq bolǵan.

«Ótken jyly «El Arna» telearnasyn ashý týraly sheshim qabyldandy. Qazirgi ýaqytta medıaólshemder boıynsha ol telearna óziniń maqsatty aýdıtorııasyn arttyryp keledi. Búgingi tańda elimizde «Balapan», «Qazsport», «El Arna» telearnalarynyń aýdıtorııasy jyl sanap kóbeıýde. Odan bólek, «Tamasha» telearnasynyń ashylǵanyn bilesizder. ıAǵnı, Qazaqstanda salalyq telearnalardyń suranysqa ıe bolyp jatqanyn baıqap otyrmyz», - dedi ol.

Eske sala ketsek, elordadaǵy «Qazmedıa» ortalyǵynda úsh kúnge sozylatyn Ortalyq Azııadaǵy eń iri medıa-oqıǵa — Astana Media Week ótip jatyr.

Astana Media Week-tiń birinshi kúni serıaldyq ónimderdi ázirleý jáne shyǵarý taqyrybymen jáne salyq preferentsııalary, kıno prokatynyń sharttary, mazmuny, fılm óniminiń shyǵarmashylyq deńgeıi jáne onyń demeýshiler úshin tartymdylyǵy, salalyq telearnalar máselesi taqyrybymen erekshelenedi.