Lázzat Ramazanova Kýba elshisi Emılıo Pevıdo Pýpo myrzamen kezdesti

NUR-SULTAN. QazAqparat – Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Lázzat Ramazanova Kýba Respýblıkasynyń Qazaqstan Respýblıkasyndaǵy Tótenshe jáne Ókiletti elshisi Emılıo Pevıdo Pýpo myrzamen kezdesti, dep habarlaıdy QazAqparat.

Kezdesý ótkizý jaıynda kýbalyq tarap Kýba áıelderiniń federatsııasymen (FMC) yntymaqtastyqty nyǵaıtý maqsatynda bastama kótergen. Álemdegi barlyq áıelder uıymdarymen baılanys ornatý jáne ony nyǵaıtý FMC uıymynyń kún tártibindegi basty maqsattyń biri. Óz kezeginde bul kezdesý halyqaralyq uıymdar aıasyndaǵy qazaqstandyq-kýbalyq ózara qarym-qatynasty nyǵaıtýǵa, eki taraptyń BUU aıasyndaǵy mindettemelerin oryndaýǵa, Áıelderge qatysty kemsitýshiliktiń barlyq túrin joıý jónindegi tujyrymdama aıasynda qabyldanǵan mindetterdi oryndaýǵa yqpal etpek.

Kezdesýde qazaqstandyq-kýbalyq qarym-qatynasty damytýdyń joǵary deńgeıde ekeni atap ótilip, qos taraptyń kún tártibindegi jáne jalpyǵa ortaq aýqymdy suraqtar talqylandy. Kezdesýde taraptar halyqaralyq arenadaǵy áleýmettik mańyzdy máselelerde Nur-Sultan men Gavana arasyndaǵy yntymaqtastyqty nyǵaıta túsýge múddeli ekenin tanytty. Atap aıtqanda, áıelder quqyǵy jáne olardyń múmkindikterin keńeıtý jolyndaǵy ózara yntymaqtastyqtyń ózektiligi atap ótildi.