Lazzat Ramazanova Qazaqstannyń Aýǵanstan áıelderine tranzıttik dálizdi usynýyna pikir bildirdi
«Búgin QR Syrtqy ister mınıstrligi aýǵan áıel sýdıalary men parlamentshilerin jáne olardyń otbasy múshelerin Qazaqstan arqyly úshinshi elderge tranzıtpen ushýy júzege asyrylǵanyn habarlady. Tranzıt Memleket basshysynyń sheshimimen jáne Qazaqstan Respýblıkasy Úkimetiniń tikeleı kómegimen júzege asyryldy.
Aýǵandyq áıelderdiń qaýipsizdigi Ortalyq Azııa aımaǵyndaǵy basty qaýipsizdik máseleleriniń biri bolyp tabylady. Sankt-Peterbýrgte ótken 3-shi Eýrazııalyq áıelder forýmynda elimizdiń delegatsııasy barlyq memleketterdiń áıelder kóshbasshylaryn Aýǵanstandaǵy áıelderdiń jaǵdaıyna nazar aýdarýǵa shaqyrdy.
Men óz sózimde, halyqaralyq qaýymdastyq osyndaı aýmaly kezeńde olardy qıyn jaǵdaıda jalǵyz qaldyrmaý kerektigin atap óttim!», - dep jazdy L.Ramazanova Facebook-te.
Onyń aıtýynsha, aýǵandyq áıelderge shıelenis pen qaqtyǵys oshaqtarynan ketýge berilgen múmkindik – Qazaqstan málimdegen bastamalardyń naqty iske asýy.
«QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa Ortalyq Azııa aımaǵynda beıbitshilik pen qaýipsizdikti nyǵaıtý máselelerin alǵa jyljytýdy jalǵastyrýǵa nıetti», - dedi Lazzat Ramazanova.
Buǵan deıin habarlaǵanymyzdaı, Qazaqstan Aýǵanstan áıelderiniń úshinshi elderge ushyp shyǵýy úshin Almaty áýejaıy arqyly tranzıttik dáliz usyndy.