Lázzat Qıynov «QazMunaıGaz» Barlaý Óndirý» AQ dırektorlar keńesiniń múshesi bolyp saılandy
«Kompanııanyń dırektorlar keńesiniń jalpy qyzmet etý merzimine dırektorlar keńesiniń jańa múshesi bolyp Lázzat Qıynov saılandy»,- delingen habarlamada.
Lázzat Ketebaıuly Qıynov - 1971 jyly V.I. Lenın atyndaǵy Qazaq polıtehnıkalyq ınstıtýtyn bitirgen, taý-ken ınjeneri. Tehnıka ǵylymdarynyń doktory.
Instıtýtty tamamdaǵannan keıin «Jetibaımunaı» munaı-gaz óndirý basqarmasynyń munaı men gaz endirý jónindegi operatory bolyp jumys isteı bastaıdy. Keıin «Mańǵyshlaq munaı hımııa ónerkásip» aýmaqtyq-óndiristik basqarmasynyń bas ınjeneri, «Karajanbastermunaı» munaı-gaz óndirý basqarmasynyń bastyǵy, «Komsomolmunaı» munaı-gaz óndirý basqarmasynyń bastyǵy bolady. 1992 jyldan 1993 jylǵa deıin «Mańǵyshlaqmunaı» óndiris birlestiginiń bas dırektory, 1993 jyldan 1995 jylǵa deıin Mańǵystaý oblystyq ákimshiliginiń basshysy, 1995 jyldan 1997 jylǵa deıin munaı jáne gaz óndirisi mınıstriniń orynbasary,1997 jyldan 1999 jylǵa deıin Kaspıı qubyry konsortsıýmynyń (Almaty qalasy) bas dırektory, 1999 jyldan 2002 jylǵa deıin Mańǵystaý oblysynyń ákimi qyzmetin atqarady. 2002 jyldyń aqpanynan 2003 jyldyń naýryzyna deıin «QazMunaıGaz» Ulttyq kompanııasy» jabyq aktsıonerlik qoǵamynyń prezıdenti, 2003 jyldyń naýryz aıynan beri QR Energetıka jáne mıneraldyq resýrstar, keıin QR Munaı jáne gaz vıtse-mınıstri.
1987 jyly Shevchenko qalasynyń Munaıly aýdany boıynsha aýdandyq keńes depýtattyǵyna, al 1990 jyly halyq depýtattarynyń qalalyq keńes depýtattyǵyna saılanady. 1990 jyly Qazaqstan Respýblıkasy halyq depýtattary Joǵary Keńesiniń depýtaty bolyp saılanady. 1999 jyly «Parasat» ordenimen marapattalǵan.